Anda di sini

Apai indai patut meransang anak dalam pengawa dagang

Advertisement
 Bisi 250 iku pesereta ti datai ninga licha Program ‘Jom Turun Padang Ke Arah Kemakmuran Bersama ti diatur IKM Zon Sarawak kemari.
PENEMU KOPERASI: Bisi 250 iku pesereta ti datai ninga licha Program ‘Jom Turun Padang Ke Arah Kemakmuran Bersama ti diatur IKM Zon Sarawak kemari.

MIRI: Apai indai patut muai runding ti madahka bala anak ke udah tembu sekula patut begigaka kereja sementara, tang sida patut meransang bala anak ngaul diri enggau pengawa bedagang.

Direktor Koperasi Malaysia Zon Sarawak Siti Maimunah Jerni madahka Insitut Koperasi Malaysia (IKM) meratika pematut raban nembiak ngaul diri dalam pengawa bedagang.

“Juluk kitai iya nya deka ngadaka mayuh agi orang dagang baru kelebih agi ti udah tembu sekula ngaul diri dalam pengawa dagang dikena nambahka penatai pemisi,” ku iya lebuh ti dikerandau maya Program ‘Jom Turun Padang Ke Arah Kemakmuran Bersama’ ti diatur IKM Zon Sarawak kemari.

Ku iya, IKM mega sama bisi nyendiaka mayuh pelasar dikena mantu raban tu ngelakuka produk sida nengah chara ‘on-line’.

“Kitai bisi inisiatif dalam nyungkak potensial orang dagang di menua tu nengah kerejasama enggau kompeni e-Dagang AliBaba.Com sereta mega ‘Youtube’.

“Beserimbai enggau nya, apai indai patut meransang anak sida ngaul diri enggau pengawa dagang ti engkeman enggau juluk IKM ti deka nyadika raban nembiak diatu chakah enggau pengawa dagang,” ku iya.

Nitih ku Siti Maimunah, IKM mega bisi nyendiaka Program MiRiCLe, Keusahawanan Koperasi, Transformasi Minda IR4.0, Sustainable Development Goal (SDG) sereta Social Entrepreneur (SE) ngagai raban operasyen.

“Program MiRiCLe iya nya insiatif IKM mantu koperasi dalam ngangkatka tikas pemanah dagang koperasi ngagai penyampau bejuta ringgit,” ku iya nerang.

Iya mega nambah, nengah pansik iya nya majoriti koperasi di Malaysia bisi SE, tang nya enda ditukuka tauka nadai setipikit ari IKM.

“Koperasi ti bisi setipikit khas SE ke dikeluarka IKM nya deka terus meri pemaik ngagai orang ti meri pinjau dikena ngatur aktiviti enggau koperasi lalu pia mega sida deka bulih nyeliahka diri ari chukai,” ku iya.

Beserimbai enggau nya mega, IKM sama bejalaika pengawa mantu ‘ngidupka’ baru koperasi di Sarawak ke udah enda aktif berindik ari sekeda faktor.

“Kitai ngembuan 1,080 koperasi ti berejister tang semina 60 peratus ari penyampau nya ti agi aktif, IKM Sarawak deka mantu koperasi tu ngambika terus aktif dikena pemansang modal mensia,” ku iya nerang.

Ba kenang ke bukai, bisi 250 iku pesereta ari Zont Utara iya nya ari Lawas, Limbang, Bintulu enggau Miri udah datai ba program nya.

Sida iya nya ari kaban koperasi, staf perintah, gerempung ukai dikuasa perintah, orang dagang sereta individu.

Program ‘Jom turun Padang Ke Arah Kemakmuran Bersama’ ti diatur IKM Zon Sarawak nya udah diatur kena 14 Januari tu tadi lalu deka tembu di Kuching kena 30 Januari tu.

Advertisement