SIBU: Orang ke ngempu Tanah Adat Bansa Asal (NCR) ba Pelilih Menua Batang Oya, Ulu Oya, Sekuau enggau Pakoh beterima kasih ngagai perintah Gabungan Parti Sarawak (GPS),laban udah ngemendarka tanah NCR sida disukat ari baruh Seksyen 18.
Chairman Serakup Pemansang Pelilih Batang Oya, Sekuau enggau Pakoh Kunsilor Henry Kanyan Vincent Rawing madah, tanah NCR Pelilih Batang Oya, Ulu Oya, Sekuau enggau Pakoh udah dikemendar Opis Tanah enggau Survei (JTS) ngambika disukat nengah Seksyen 18.
“Pemesai JTS Sibu Cecelia Sintan madahka ngagai kami bekaul enggau tanah NCR Pelilih Batang Oya, Sekuau enggau Pakoh dikemendarka disukat ari baruh Seksyen 18.
“JTS semina nganti maya aja deka nganjung raban sida nyukat tanah ba endur nya,” ku iya ke mega nyadi pengari 64 buah rumah panjai ari pelilih menua Batang Oya, Sekuau, Stapang enggau Pakoh pengudah ti nemuai lalu baum ngagai Opis JTS Sibu.
Kunsilor Kanyan ke mega Exco Nembiak Parti Rakyat Sarawak (PRS) madah,program nemuai nya diatur alai berandau sereta berundingka chara ngelengkaska pengawa nyukat tanah NCR nya.
Kelimpah ari nya, ba program nemuai tu mega sida bisi baumka pekara bekaul enggau pemansang tanah dikena raban JTS nyukat tanah rumah panjai ba Sekuau.
“Kami mega minta nyerahka hak ngempu tanah ba Sekuau ngagai semua peranak asal ba pelilih ditu empu(Sekuau), lalu lot lada di Sekuau mega diberi hak ngempu tanah ba tanah Rascom Sekuau,” ku iya ke mega kaban Kaunsil Menua Pesisir Sibu(MDLBS).
Berebak enggau tu mega, Kanyan madahka perintah nengeri ti betuaika Kepala Menteri Datuk Patinggi Abang Johari Tun Openg seruran ngereja pengawa bebendar ke rayat.
Kena bulan Disember 2019, urung 998 iku orang ti ngempu tanah NCR ari pelilih menua Pakoh, Sekuau, Bejait, Seluan enggau Ulu Tebalai, minta Perintah Sarawak nengah JTS ngelengkaska pengawa nyukat tanah sida ari baruh Seksyen 18.
Tanah NCR nya ngembuan pemesai 33,000 hektar udah ‘digezet’ ngagai Seksyen 6 ba taun 2016, JTS udah ngatur program berandau enggau orang ti ngempu tanah nya lalu madahka pengawa nyukat diatur nengah Seksyen 18.
Sama bisi datai iya nya Penghulu Andrewson Ngalai Asom sereta enggau bala ke bukai lebuh ti nemuai berandau ba Opis JTS Sibu ditu.