SIBU: Sistem e-tiket deka meri pemaik ngagai peranak di nengeri tu ba pengawa meli tikit bot ekspres nengah chara digital, dipelabaka berengkah diatur tengah taun tu ila.
Menteri Perengka Pengangkut Datuk Lee Kim Shin madah, ke diatu raban opis menteri nya benung ngatur pengawa ngulihka pemendar ari Kaunsil Multimedia Sarawak (SMA).
“Ba renggat keterubah tu, kitai deka mansik sereta ngatur jalai bot ekpres ba kandang menua tengah iya nya Sibu, Kapit, Song enggau Kuching.
“Enti semua pengawa tu mujur diatur, kitai ngarapka sistem e-tiket ungkup renggat keterubah tu ulih dipejalaika ba tengah taun tu.
“Tu sekeda program ari opis menteri dikena ngemansangka tikas servis kitai ti bepelasarka Ekonomi Digital ba Sarawak,” ku saut iya lebuh dikerandau pengarang berita bekaul enggau pemansang sistem e-tiket nya.
Iya bejaku madah munyi nya ba pengawa aum media pengudah ti ngulu Program Bejadi Kimpin Pengelikun Perengka Pengangkut Sungai Beserimbai Enggau Nyambut Taun Baru China 2020 ke ba Terminal Penumpang Bot Ekspress Sibu, kemari.
Nitihku Lee, rikod penumpang bot di Sarawak ba taun 2018 nyentuk 2019 majak nambah.
“Ba taun nyin kemari (2019), kami bulih rikod penumpang sepenyampau 2,893,871 iku lalu rikod penumpang ba taun 2018 iya nya 2,518,249 iku.
“Ari rikod tu tadi, kitai ulih meda penyampau nya nambah ngagai 30 peratus,” ku iya.
Berebak enggau nya, Lee madahka opis menteri nengah Kaunsil Sungai Sarawak (LSS) seruran beratika semua terminal bot ekspres ke udah bisi, ba tikas pengelikun ti patut sereta manah.
Berindik ari tu, opis menteri meri bantu urung RM500,000 dikena ngemansangka fasaliti ringkat atas ba Terminal Penumpang Bot Ekspress Sibu ditu, ti dipelabaka berengkah dipejalaika taun tu.
“Seharitu kami deka meri pelin kereja ngagai raban kunteriktor, kami ngarapka pengawa ngemansangka terminal tu berengkah dipejalaika enda lama agi lalu semua nya tembu dalam taun tu mega.
Berebak enggau nya, Kimpin Pengelikun Perengka Perangkut Sungai Beserimbai Enggau Nyambut Taun Baru China 2020 renggat keterubah berengkah dipejalaika ari 14 nyentuk 23 Januari sereta renggat kedua deka dipejalaika kena 1 enggau 2 Februari.
Ba program tu, Chairman LSS Murni Suhaili, Sekretari Politik Kepala Menteri Michael Tiang enggau Sapit Residen Sibu Wong Hee Sieng sama bisi datai.