SIBU: Menteri Perengka Pengangkut Sarawak Datuk Lee Kim Shin ngelalau pengawa meresa pengelikun bot ekspres enggau penumpang patut nitihka atur perintah ti udah ditetapka Kaunsil Sungai-Sungai Sarawak (LSS).
Ku iya madah, atur pengelikun bot ekspres enggau penumpang ti bepelasarka Standard Operasyen Prosedur (SOP) endang beguna amat dikena nyeliahka penusah ti tau nyadi sebarang maya.
Nitihka penemu iya, ari pansik ti udah dipejalaika mandangka mayuh penusah enggau penanggul ti nyadi bepun ari penyilap mensia nya empu.
“Aku deka mesan semua penumpang ti pulai ke menua nyerumba pengerami Taun Baru China tu, patut nitihka atur perintah ti bekaul enggau pengelikun diri lebuh dalam bot.
“Enti semua penumpang enggau pengemeran dagang bot ekspres nitihka atur ti udah ditetapka maya ba terminal tauka dalam bot, aku pechaya semua penusah ulih diseliahka.
“Ukai nya pengudah kitai meda bala pemesai penguasa meresa baru deka ngerasukka jaket pengelikun, enti kita enggai nyaga pengelikun diri empu, sapa agi diandalka kita?,” ku iya mesan enggau nyemetak.
Lee bejaku munyi tu ba Program Bejadika Kimpin Pengelikun Perengka Pengangkut Sungai Beserimbai enggau Nyambut Pengerami Taun Baru China 2020 ba Terminal Penumpang Bot Ekspres Sibu, kilah ensana.
Sama bisi datai Chairman LSS Dr Murni Suhaili, Kaban Kaunsil Direktor LSS Dato Chieng Buong Toon, Sekretari Politik Kepala Menteri Michael Tiang enggau Sapit Residen Sibu Wong Hee Sieng.
Berebak enggau nya, Lee muji inisiatif ti dipejalaika LSS nengah kimpin pengelikun nya ke mega ulih meri lalau sereta pemereti ati ngagai mensia mayuh bekaul enggau pengelikun diri lebuh ti begunaka perengka pengangkut sungai.
“LSS ngembuan raban pemesai ba tetiap terminal penumpang bot ekspres lalu sida seruran nyingkap diri deka mantu sereta meri servis ngagai mensia mayuh enggau raban bot ekspres, dikena meri jamin pengelikun perengka pengangkut sungai,” ku iya.
Kelimpah ari nya, Lee madahka sepenyampau 208 unit Perengka Bantu Belayar udah dipasang ba sungai di nengeri tu dikena mantu pengelikun lebuh ti belayar.
Nya alai, ba pengawa ngemansangka sistem perengka pengangkut ti manah, sikar enggau likun, opis menteri nya seruran nerima penemu ari mensia mayuh ti ulih meri empas positif ngagai sektor perengka pengangkut.
“Opis menteri deka majakka pengawa betemu tauka berandau enggau raban penerit adat sereta komiti dagang ti bekaul, ngambika ulih mantu ba pengawa ngatur stratergi dikena ngemansangka sektor perengka pengangkut di nengeri tu,” ku iya.