KUCHING: Bisi empat pekara besai akses ngagai pengelurus dikerandauka ba 'National Colloquim On Access To Justice (NCOAJ) 2020'.
Kolokium ti ngena rambai jaku 'Justice and Beyond' nya ti diatur begulai entara Malaysian Judiciary enggau United Nations Development Programme(UNDP), lalu Kort Tinggi Sabah enggau Sarawak di Kuching nyadi palan endur ngatur program, sereta dipenyadi Ketuai Akim Malaysia Tan Sri Tengku Maimun Tuan Mat.
Tengku Maimun lebuh bejaku seraya bejadika kolokium nya madahka, kolokium nya amat beguna ti berandauka beberapa isu bekaul enggau akses ngagai pengelurus.
"Empat pekara ti dikemekuhka ba kolokium tu, keterubah, pasal mai pengelurus ari sukut undang-undang ngagai raban bansa di kandang menua ulu enggau menua pesisir, kedua, ngemanahka bantu undang-undang nengah struktur undang-undang enggau pasal belanja ti dikemanahka agi.
"Ketiga, nambahka peneleba orang ke bedawa (litigants) ti diarika diri enggau keempat, pemansang teknologi ungkup pemuntang enggau penyamai akses ngagai pengelurus nitihka atur undang-undang," ku iya lebuh bejaku bejadika 'National Colloquim On Access To Justice 2020' ti diatur ba sebuah hotel ditu, seharitu.
Tuju kolokium nya endur berandau sereta nyerungkai isu pasal akses ngagai pengelurus ba undang-undang sereta dikearapka nengah kolokium ulih ngemesai enggau ngenegapka pengawa ngatur, operasyen enggau langkar undang-undang akses ngagai pengelurus dalam Malaysia kelimpah ari nguna peluang ngena teknologi dikena ngangkat enggau ngemesaika akses nya ngagai pengelurus ti betul nitihka undang-undang.
Delegit kolokium nya nyengkaum akim, pengemeran udang-undang, pengari ari beberapa ejensi enggau opis perintah, kaban akademik enggau gerempung ukai dikuasa perintah (NGO).
Bisi 15 iku kaban panel dikena mantaika keretas kereja enggau bejau nyengkaum ari Australia, Pakistan enggau Taiwan.
Sama datai ba kolokium nya mega UNDP Resident Representative ari Malaysia, Singapura enggau Brunei Niloy Banerjee enggau Ketuai Akim Sabah enggau Sarawak Tan Sri Datuk Seri Panglima David Wong Dak Wah sereta ke bukai.