KUCHING: Statistik eksport industri kayu ramu bepelasarka rega eksport produk kayu ramu ba taun 2019 nurun sepenyampau 17 peratus dibandingka enggau taun 2018.
“Penyampau rega eksport produk kayu ramu ari Sarawak ba taun 2019 iya nya RM4.5 bilion.
“Penyampau nya nurun 17 peratus ba taun 2019 enti dibandingka enggau rega eksport RM5.4 ba taun 2018,” ku penerang berita Gerempung Pemansang Industri Kayu Ramu Sarawak (PUSAKA) ti disadung ngagai raban pengarang berita, kemari.
Penerang berita nya disadung nyerumba Seminar ‘Corporate Liability on Corruption’ ti diatur begulai entara STIDC, GRM Training Sdn. Bhd. enggau Opis Nagang Makai Suap Malaysia, ti dipenyadi Sapit Kepala Menteri ti mega Menteri Pemansang Mengeri enggau Pengeraja Asal II Datuk Amar Awang Tengah Ali Hasan ba sebuah hotel ditu, kemari.
Nitihku penerang nya mega, plywood agi nyadi produk kayu ramu pemadu mayuh ti dieksport Sarawak. Penyampau rega eksport plywood ba taun 2019 iya nya RM2.3 bilion dibandingka enggau RM3 bilion ba taun 2018. Nurun sepenyampau 23 peratus.
Nangkanka plywood iya nya batang (logs) penyampau rega dieksport ba taun 2019 iya nya RM722 juta, papan (RM583 juta), Fibreboard (RM351 juta), chip kayu (RM174 juta) enggau venir penyampau rega dieksport iya nya RM94 juta.
Nambahka nya bisi lima makit besai endur Sarawak nyual produk kayu ramu ba taun 2019 iya nya Jepun, India, Timur Tengah, Taiwan enggau Korea.
“Jepun agi nyadi makit pemadu besai endur ekport produk kayu ramu Sarawak.
“Rega eksport ke Jepun ba taun 2019 iya nya RM2.1 bilion iya nya nurun sepenyampau 22 peratus enti dibandingka enggau rega eksport RM2.7 bilion ba taun 2018.
“Nambahka nya, rega eksport produk kayu ramu iya nya India sepenyampau RM517 juta, Middle East (RM422 juta), Taiwan (RM325 juta) enggau Korea sepenyampau RM248 juta,” ku penerang ari PUSAKA.