MIRI: Graduan nadai karakter sereta lemi ari sukut komunikasyen entara kebuah enda mujur bulih penuduk ba sektor kereja.
Sapit Menteri Pelajar Teo Nie Ching madah, pansik ti dipejalaika Jobstreet udah tetemuka dua batang kebuah graduan enda diterima pengaji.
“Dua isu ti suah dibantaika pengaji lebuh milih pekereja iya nya chalun tauka graduan kurang karakter ti ngandalka sereta pengelandik komunikasyen sida lemi,” ku iya ba Pengerami Makai Lemai Meri Pengaga Ati Begulai enggau Media ti diatur DAP Miri ditu, malam ensanus.
Ku Teo, isu tu ke bendar iya bekaul endar enggau peminta pengaji ba Revolusyen Industri 4.0 ti dekaka pekereja lebih produktif sereta bekualiti.
“Ketegal nya mih kitai patut fokus ngagai ngiri pengelandik 4C (kolaborasyen, komunikasyen, berunding chara kritikal, kreativiti) tang bisi maya enda ulih diuji dalam peresa baka pengelandik komunikasyen,” ku iya.
Teo m adah, opis menteri iya udah madahka peresa ungkup nembiak Tahap 1 ti mungkur nembiak Primari Satu, Dua enggau Tiga taun nyin tadi sereta diganti enggau sistem ‘Pentaksiran Bilik Darjah’ (PBD).
“Perati tu deka nyilih peresa formal dikena nempa budaya belajar ti lebih ngerinduka lalu reti nya pengajar ulih meri perati lebih ngagai ngiri pemesai reti penyanyau, pengaga ati, sama bebasaka pengandiri sereta negapka pemansang ulah nembiak nengah chara individu,” ku iya.
Iya mega madah, tepulai ngagai kreativiti sesiku pengajar ngena bemacham chara lebuh beratika nembiak iya nengah aktiviti baka kuiz, main, pengawa ke digaga, nusui ensera enggau projek mudah.
“Kenyau ari taun siti nyin tadi, mayuh bengkah woksyop PBD udah dipejalaika di serata menua ngambika kepala pengajar meretika tuju enggau kuing KPM, lalu bala pengajar nemu bejalaika PBD ba pengawa ngadaka rebak biak ke ulih besemekih sereta bisi rega ba makit kereja lebuh napi Revolusyen Industri 4.0,” ku iya.
Bala nembiak ku iya, di perati belama nengah bemacham chara perati ti mega sebagi ari proses ngajar enggau belajar (PdP) iya nya ari sukut berati ti nyengkaum penemu, pengelandik enggau ‘value’.
“Reti nya kenyau ari taun siti nyin tadi, nadai agi peresa tengah taun enggau ujung taun, tang fokus ngagai pemansang nembiak sereta enda agi beratka peresa.
“Nengah tu apai indai nemu pengering enggau pengelemi anak sida sereta nemu nentuka bansa sukung ke tau diberi,” ku iya.
Nengah chara baru tu,pengajar deka fokus ngagai individu ba pemansang nembiak seraya madahka sida bisi dipadah sentang pengirau ati apai indai sentang PBD ti dipejalaika lalu ngarapka sida meri sukung ngagai juluk KPM.
Sama bisi datai, Kaban Dewan Negara Senator Alan Ling enggau Kaban Kunsil Nengeri Pujut Dr Ting Tiong Choon sereta PresidenSerakup Pengarang Berita Kandang Menua Utara Sarawak, Andy Jong.