Anda di sini

Semua anak kompeni ari baruh PUSAKA dilalau ngemeranka integriti ti tinggi

Awang Tengah sereta (ari kiba)  Abu Bakar,  Len,  Talib enggau (dua ari kanan) Naroden enggau pemesai kebukai begambar bebala mayuh enggau pesereta seminar nya,  seharitu. - Gambar Chimon Upon
Awang Tengah sereta (ari kiba) Abu Bakar, Len, Talib enggau (dua ari kanan) Naroden enggau pemesai kebukai begambar bebala mayuh enggau pesereta seminar nya, seharitu. - Gambar Chimon Upon

Dikarang Rengenyan Labang

KUCHING: Semua anak kompeni lebih agi ari baruh Perbadanan Kemajuan Perusahaan Kayu Sarawak (PUSAKA)  dilalau sereta diperansang meri kerejasama enggau komitmen ngagai inisiatif enggai ngaul diri enggau penyalah makai suap tauka 'anti-rasuah'.

Sapit Kepala Menteri, Datuk Amar Awang Tengah Ali Hasan madahka, nya ngambika ulih setipak enggau juluk tauka visyen Sarawak ti deka nempa budaya integriti ba nengeri tu. 

"Aku ngarapka semua anak kompeni kitai meri kerejasama enggau komitmen penuh dalam pengawa bejalaika inisiatif 'anti-rasuah' ti diuluka PUSAKA. 

"Pengawa tu deka meri pemanah ngagai semua orang sereta sama-sama kitai dalam pemaik enggau pengelantang sereta nyapai juluk tauka visyen nengeri nempa budaya integriti ti lalu ulih nyadika bansa ti lurus sereta nadai makai suap," ku iya. 

Awang Tengah ti mega Menteri Pemansang Mengeri enggau Pengeraja Asal II meri penemu nya lebuh iya bejaku maya bejadi seminar 'Corporate Liability on Corruption' ti diatur begulai entara STIDC, GRM Training Sdn. Bhd. enggau Suruhanjaya Pencegah Rasuah Malaysia ba sebuah hotel ditu, seharitu. 

Lebuh ti ngenang bekaul enggau seminar nya, Awang Tengah madah batang tuju seminar, keterubah, dikena meri kelala provisyen baru Akta Anti-Rasuah Malaysia 2018 ngagai Direktor enggau Pengurusan STIDC.

Kedua, ngambika teleba enggau pekara ti dikemerat ba provisyen baru enggau implikasyen sereta batang tuju ketiga, dikena ngangkatka program nyeliahka diri enggau penyalah makai suap ke ulih nagang, ngelala enggau madah risiko kereja meri suap dalam organisasyen. 

Ngatur seminar tu ngayanka PUSAKA bebendar meri komitmen ngagai budaya kereja integriti tinggi dalam opis, ku iya.
 
"Amat beguna ba PUSAKA enggau kompeni ti udah tegap ke betapi enggau risiko ketegal pengawa makai sereta meri suap ti ngujungka libiliti korporat. 

"Aku pechaya, seminar tu ngena amat ulih meransang akauntabiliti ba sida ti betapi enggau raban pengatur agih belanja koporat enggau aset belanja enggau nemu nama ti disebut 'wheeling and dealing' ti ulih mai ngagai runding negatif enggau ngelindung sereta nyeliah diri sida sereta organisasyen ari kena tinggang ukum undang-undang. 

"Dalam pengawa bejalaika inisiatif integriti ba renggat anak kompeni diempu PUSAKA, kelimpah ari program pemereti ati, 'Certified Integrity Officers'(CeIO) ti udah dilatih deka ngelatih pemesai bukai nyadi CeO sereta licha integriti diberi ngagai sida ti bekaul dalam aum lembaga," ku iya ti mega Menteri Dagang Antarabansa enggau Industri, Terminal Industri enggau Pemansang Orang Dagang.

Sama bisi datai Menteri ba Opis Kepala Menteru (Integriti enggau Ombudsman) Datuk Talib Zulpilip, Menteri Muda Dagang Antarabansa enggau Industri Datuk Mohamad Naroden Majais, Menteri Muda Pemansang Mengeri enggau Pengeraja Asal Datuk Len Talif Salleh, Sapit Sekretari Perintah Nengeri (Transformasyen Sosio-Ekonomi) Dato Sri Mohamad Abu Bakar Marzuki enggau General Manager PUSAKA Hashim Bojet enggau ke bukai.