Anda di sini

PRS nadai nerima notis ari SPRM bekaul enggau duit 1MDB

Advertisement

KUCHING: Parti Rakyat Sarawak (PRS) bedau nerima sebarang notis ari Opis Nagang Makai Suap Malaysia (SPRM) ti deka ngambi pulai duit ti dikaitka enggau 1Malaysia Development Berhad (1MDB).

Pia ku Sapit Kepala Menteri, Tan Sri Datuk Amar Dr. James Jemut Masing ke mega Chairman PRS lebuh dikerandau media ba pengerami Makai Lemai beserimbai enggau Forum Kualiti enggau Pengelikun Opis Kereja Raya (JKR) Sarawak di sebuah hotel tebilang ditu, kena malam Hari Satu tu tadi.

“Sida nadai minta kami mayar pulai, nya alai nama kebuah mayar? Sida nadai nganjung notis ngagai kami, nya alai kami deka nganti sereta meda nya dulu,” ku iya.

Ditanya sekalika parti nya udah ngaga sempekat enggau SPRM sentang mayar duit nya nengah chara pupuk, ku Masing, parti nadai ngaga pengawa ke baka nya.

“Kami semina madah ngagai sida nama pengawa ke digaga kam, nya aja,” ku iya.

Kena 8 Oktober taun siti nyin tadi, Kaban Kunsil Nengeri Pelagus Wilson Nyabong Ijang ngaku parti nya nerima RM1 juta ari ex-Menteri Besai ke mega Chairman Barisan Nasional (BN) Datuk Seri Najib Tun Razak.

Nyabong ti dikearapka Presiden Parti (Tan Sri Datuk Amar Dr James Masing) ngatur duit politik nya madahka duit nya dibelanja ke pengawa politik sebedau pengawa bepilih besai taun 2013.

Ku iya, PRS udah bekerejasama enggau pemesai SPRM kena bulan Julai taun siti nyin tadi lalu madah silik ngagai sida bakani duit nya dibelanjaka.

“Kami lurus ati. Kami meri sida semua penerang. Enti ‘bos’ nuan meri duit ungkup pengawa politik, nuan enda deka nanya ngagai iya ari ni penat ai duit nya. Nya mih senario ke nyadi ba kami. PRS parti ke seranta,” ku jaku iya ke diambi ari The Borneo Post.

Berebak enggau nya, SPRM udah ngeluarka notis kompaun ari baruh Akta ‘Pencegahan Pengubahan Wang Haram, Pencegahan Pembiayaan Keganasan enggau Asil Ari Aktiviti Haram 2001’.

Tuju nya dikena ngulihka baru semula duit 1MDB ari 80 iku individu, kompeni enggau entiti politik.

Ketuai Komisioner SPRM Latheefa Koya madahka atur deka diambi ngagai orang ti enda ulih mulaika duit nya, nyengkaum didawa ba kort ari baruh Akta.

Nitihka rintai nama ti dikeluarka SPRM baka ti dibantaika media, kelimpah PRS, antara ke nerima notis kompaun iya nya ex-Chairman CIMB Group Holdings Bhd (CIMB Group), Datuk Seri Nazir Razak, MP Pontian, Datuk Seri Ahmad Maslan, ex-Chairman Felda, Tan Sri Shahrir Samad, Indu Opis MIC, Pampang Puteri UMNO enggau Indu UMNO.