Anda di sini

Pengawa numbuhka JKKK stratergi nempa rayat bediri ngatika diri, proaktif dalam pemansang

Advertisement
 Bujang (enam kiba) benung nyuaka dokumen Balai Mensia Mayuh ngagai Tuai Rumah Lichang (enam kanan) seraya dikemataka Harden (tengah) enggau ke bukai.
NYERAH: Bujang (enam kiba) benung nyuaka dokumen Balai Mensia Mayuh ngagai Tuai Rumah Lichang (enam kanan) seraya dikemataka Harden (tengah) enggau ke bukai.

SRI AMAN: Pengawa numbuhka Komiti Pemansang enggau Pengelikun Pendiau (JKKK) ba tetiap genturung pendiau enggau rumah panjai di nengeri tu siti ari stratergi dikena nempa rayat ti bediri ngatika diri sereta proaktif dalam pemansang.

Menteri Muda Pengelantang Pendiau Komuniti Sarawak, Datuk Francis Harden Hollis madah, organisasyen JKKK nya sebuah gerempung ti beguna amat bejalaika pun pengawa.  

“Nya alai, endang patut ketuai JKKK diberi latih pengelandik ba semua pekara bekaul enggau numbuh, ngatur pengawa JKKK enggau pemansang dikena nempa JKKK ti bisi juluk, bediri ngatika diri, produktif sereta maju.

“Ketuai ke sikar bejalaika pengawa dalam organisasyen nyadi batang pekara dikena ngangkatka pemansang ba genturung pendiau ngambika lebih progresif sereta teratur. Tu laban ketuai raban bansa, ketuai ba endur nya enggau institusyen JKKK nyadi ‘focal point’ lebuh ke betemu sereta berandau enggau raban perintah laban projek enggau bantu ti disediaka perintah deka diberi, diterima sereta diatur sida,” ku iya.

Iya ke mega Kaban Kunsil Nengeri Simanggang madah munyi nya lebuh bejaku ba Pengerami Mit Nyerahka Balai Mensia Mayuh Komiti Pemansang enggau Pengelikun Pendiau (JKKK) Rumah Lichang, Entawa Undop, Sri Aman ditu bedau lama udah.

Ku iya, ketuai raban bansa diatu patut nemu agi sentang utai ke nyadi ngelingi sida, pengawa sida majak mar sereta seruran berubah setipak enggau ubah ke nyadi diatu ketegal penemu ekonomi, globalisasyen enggau teknologi pemadah sereta komunikasyen.

“Maya nya mih ketuai raban bansa tu patut ngemeranka pengelandik nyadi ketuai ngiring sereta ngemajuka peranak genturung pendiau.

“Nya alai, ketuai raban bansa patut mantaika sada enggau peneka nembiak redak sida sereta nyeliahka pemerat diri,” ku iya.

Ku iya, pengerembai pemansang ti udah dijapai nengeri tu diatu endang asil komitmen enggau penyakah perintah enggau bala ketuai ti landik ke udah dipilih rayat empu.

Tambah iya, semua tu udah dijapai laban bisi sukung penuh ari semua kelebih agi rayat empu.

“Rayat ti nyauka serap enggau deka nyadi tagit pemansang sereta deka terus dikemeratka,” ku iya.

Sama bisi ngulu pengerami nya, Injinir Seksyen, JKR Bagi Menua Sri Aman, Bujang Kanang, Injinir Perintah, JKR Sri Aman, Michelle Christie Felix, Injinir Perintah, JKR Sri Aman, Salihah Salim, Penulung Injinir, JKR Sri Aman, Theresa Chanda Lionel, Sapit Tuai Kaunsil Majlis Daerah Sri Aman (MDSA), Kunsilor Andar Suntai enggau ke bukai.

Ungkus Fasa I ngaga Balai Mensia Mayuh nya RM300,000 lalu projek ngangkatmanah Balai Mensia mayuh nya nyengkaum dapur enggau agu ba Fasa II begunaka ungkus RM180,00 ke alai semua ungkus projek nya sepenyampau RM480,000. Projek nya ari baruh Projek Tranformasyen Menua Pesisir (RTP) Harden ari baruh DUN Simanggang.

Advertisement