Anda di sini

Pemutus peminta Petronas bekaul Komisioner Akim matak diri dikeluarka kena 23 Januari

Advertisement
 Hasidah nerangka pasal kes saman nya ngagai pengarang berita.
MERI PENERANG: Hasidah nerangka pasal kes saman nya ngagai pengarang berita.

KUCHING: Kort Tinggi kemari netapka 23 Januari ke deka datai tu meri pemutus pasal peminta Petroliam Nasional Berhad (Petronas) bekaul enggau Komisioner Akim, Christopher Chin Soo Yin ti matak ari kes saman sivil perintah Sarawak enggau Pengawal Chukai Nyual Nengeri (SST).

Luyar Besai Nengeri, Datuk Talat Mahmood Abdul Rashid madah, Petronas madahka pengirau ati sida pasal Komisioner Akim nya ngenukuka diri nyadi akim Kort Tinggi dudi ila.

“Pengawa nyiri iya (Christopher) deka bepanggai penuh ba jaku lalau Menteri Besai.

“Petronas bepenemu nyema iya ngarika sida dalam kes tu, iya deka ditukuka nyadi Akim Kort Tinggi,” ku iya madah ngagai pengarang berita pengudah tembu prosiding ba bilik akim kemari.

Ku Talat mega, nyema pekara tu amat nyadi ba Komisioner Akim nya, nya mega patut dikena ba semua akim bukai.

“Pekara tu mega patut dikena ba Akim Kort Apil enggau akim kort federal laban pengawa ngenukuka sida semua mega bepanggai ba jaku lalau Menteri Besai,” ku iya.

Berebak enggau nya, luyar ti ngarika Petronas, Datuk Malik Imtiaz Sarwar nerangka tuju ke bendar Petronas minta akim matak diri laban Komisioner Akim nya nadai status nyadi siku akim.

Nitihku iya mega, sida iya nadai penanggul enggau iya (Christopher) ari sukut efisyen enggau integriti.

“Komisioner Akim mega patut nengah timpuh diuji sebedau dichiri sah nyadi siku akim.

“Nya alai, dalam kes tu, kami semina dekaka kes ti dipendingka sida ti udah dikemendar nyadi Akim Kort Tinggi,” ku iya.

Ku iya mega, pekara tu dikena nyeliahka ari peragam bepenanggul ti deka datai ari mensia mayuh ti deka melabaka Komisioner Akim benung dekaka diri ditikika pangkat.

“Kami mega enda ibuh nyema akim ti dichiri nya anak Sarawak. Iya ulih ari enda ngira akim ari Kort Tinggi Kuching. Pekara tu ngambika mensia mayuh enda mayuh jaku,” terang iya.

Kemari beratika kes saman sivil Perintah Sarawak enggau Penyaga SST ngagai Petronas dipendingka ba bilik akim.

Kena 21 November taun nyin kemari, perintah nengeri nyaman Petronas berindik ari ti enda ulih mayar Chukai Nyual Nengeri (SST) ba produk petroleum ari baruh Ordinan Chukai nyual Nengeri 1998.

Petronas enda mayar SST enggau penalti lebih ari RM1.3 bilion.

Entara ke bisi datai kemari meri sukung iya nya Sapit Kepala Menteri Datuk Amar Douglas Uggah Embas, Menteri Muda ba Opis Kepala Menteri (Undang-undang, Kaul Nengeri enggau Perintah Besai enggau Matau projek), Datuk Sharifah Hasidah Sayeed Aman Ghazali, Menteri Dagang Temuai, Seni, enggau Main Asal sereta Nembiak enggau Lumba enggau Main Datuk Abdul Karim Rahman Hamzah Sereta Menteri Muda Dagang Temuai, Seni enggau Main Asal Datuk Dr Sebastian Ting, Menteri Muda Nembiak enggau Lumba enggau Main Datuk Snowdan Lawan, Menteri Muda Pekara Korporat enggau Unit Komunikasi Awam Sarawak Abdullah Saidol, Sekretari Besai GPS Datuk Alexander Nanta Linggi.

Advertisement