Anda di sini

Pemesai SFC udah dianjung ke Lingga mansik semilan individu ti tetemuka ular sawa

 Pemesai SFC ngambi sampel ari tisik, kulit, tulang sereta ulat ngambika dipansik.
MANSIK: Pemesai SFC ngambi sampel ari tisik, kulit, tulang sereta ulat ngambika dipansik.

KUCHING: Beberapa iku Pemesai Sarawak Forestry Corporation (SFC) udah dianjung ngagai Lingga bejalaika pengawa mansik sereta nanya semilan iku individu berindik ti tetemuka siku ular sawa lelaki ti udah parai enggau pemanjai 5.5 meter bedau lama udah.

Nitihka penerang berita SFC, sida udah ngiga individu ti mantaika video nya ba media rama kena 8 Januari tu tadi.

“Sekumbang pansik nya dipejalaika berengkah ari 8 nyentuk 12 Januari tu tadi, pemesai SFC ngiga orang ti mandangka video ti ‘diviral’ nya.

“Pengudah ngambi timpuh 4 jam ari Kuching ngagai Lingga, 30 minit ngena bot ngagai endur nya sereta 3 km bedarat nengah kampung ti luchak ngagai palan ba Sungai Sekupang, Lingga ke alai bangkai ular sawa nya ditinggalka.

“Ketegal gaya hari ti enda tentu manah, pengudah SFC datai, bangkai ular nya udah bebau but, diempa ulat sereta buruk. Raban nya ngambi teda tisik, kulit, tulang enggau ulat ngambika dipansik,” ku iya.

Kes nya dipansik ari baruh Seksyen 29 (2) Ordinan Nyaga Jelu Siga 1998.

Sida ti ditemu ngasu, munuh, nangkap, nyual, minta deka nyual, diasuh nyual, ngimport tauka eksport, benung nginang tauka ngembuan bagi tubuh, derivatif mega sarang jelu ti dijaga nya kelimpah ari baruh atur sereta penetap lisin ti udah dikeluarka ari baruh Ordinan, nya salah ba undang-undang.

Enti ditemu salah, orang ke salah ngereja nya deka dijil setaun sereta ditinggang ukum RM10,000.

Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka ular sawa nya spesis ti dijaga ari baruh Ordinan Nyaga Jelu Siga, 1998.

Nya alai, ke pengelikun mensia mayuh enda diperansang ngambi sebarang atur kediri ba jelu siga ti tau ngenusahka tu.

Pekara nya patut diripot terus ngagai opis bekuasa nengah ‘hotline’ SFC ba lumur 0168565564/0198859996 (Kuching), 0198883561 (Sibu), 0198223449/ 0198332737 (Bintulu) enggau 0198290994/0189799778 (Miri).