Anda di sini

Orang ti betengahka jalai alun dilalau bejejimat nengah PBH

Advertisement
 Jack (tengah) begambar enggau raban pengari ejensi sebedau bejadika kimpin pengelikun jalai alun.
NYAGA PENGELIKUN BA JALAI ALUN: Jack (tengah) begambar enggau raban pengari ejensi sebedau bejadika kimpin pengelikun jalai alun.

BINTULU: Orang ti ngena mutosikal nyengkaum mensia mayuh ti bekenaka jalai alun dilalau seruran bejejaga kelebih agi sida ti nengah projek Jalai Besai Pan Borneo (PBH) ti benung digaga.

Semua orang deriba endang patut bejimat nitihka semua papan tanda pengelikun jalai enggau nitihka garis atur pengelikun kelebih agi ba palan ke suah penusah penyadi, ku Residen Bintulu Jack Aman Luat.

Ku iya madah semua orang ti nengah jalai alun patut bejejaga enggau sebarang penusah ti ulih nyadi lalu nya tau ngujungka penusah bebadi nyadi ba jalai alun.

Jack ke mega Chairman Kaunsil Pengelikun Jalai Alun Pelilih Menua madahka tu lebuh bejadika Kimpin Pengelikun Jalai Alun beserimbai enggau Taun Baru Cina kemari.

Kimpin nya diatur nengah kerejasama Kaunsil Pengelikun Jalai Alun Bintulu, Opis Pengelikun Jalai Alun, Polis Diraja Malaysia (PDRM), Opis Perengka Pengangkut Darat (JPJ), Shell MDS sereta ejensi bekaul ke bukai.

Jack madahka ngagai bala ti ngena mutosikal, sida ulih nampal tanda pelekat ba tisi mutosikal ngambika lansik agi meda maya nengah jalai malam ngagai sida ti ngena mutosikal.

“Penyalah ari sukut mensia entara ke pemadu tinggi ba penusah bebadi jalai alun.

“Aku ngasak ejensi penerit atur baka PDRM sereta JPT ngambika seruran bejalaika pengawa ‘Ops Selamat’ sereta ‘Ops Bersepadu’ ti ngemeratka agi sentang advokasyen enggau neritka atur pengelikun jalai bepelasarka ba pengawa matau sereta konsep statik ba palan ‘blackspot’,” ku Jack.

Iya mega ngansak mayuh agi sektor korporat, kompeni peribit sereta Gerempung Ukai Dikuasa Perintah (NGO) bejalaika kimpin pengelikun jalai alun nyadi sebagi ari program Tanggungpengawa Rama Korporat (SCR) sida.

Ngagai orang bekenaka jalai alun beserimbai enggau pengerami Taun Baru Cina, Jack ngelalau sida ngambika meresa pengelikun perengka pengangkut sida dikena nentuka tikas gaya perengka pengangkut manah maya nengah jalai alun.

Baju pengelikun reflektif, helmet enggau sekeda barang deka diberi ungkup orang ti bekenaka jalai alun lebuh kimpin nya diatur ba Kelab Golf Bintulu di jalai Tanjung Kidurong.

Advertisement