Anda di sini

Eksport industri kayu ramu Sarawak 2019 nurun 17 peratus dibanding taun 2018

Advertisement
Awang Tengah (kanan) betabi enggau siku ari pesereta seminar 'Corporate Liability on Corruption' seharitu. - Gambar Chimon Upon
Awang Tengah (kanan) betabi enggau siku ari pesereta seminar 'Corporate Liability on Corruption' seharitu. - Gambar Chimon Upon

Dikarang Rengenyan Labang

KUCHING: Statistik eksport industri kayu ramu bepelasarka rega eksport produk kayu ramu ba taun 2019 nurun sepenyampau 17 peratus dibandingka enggau taun 2018.

"Penyampau rega eksport produk kayu ramu ari Sarawak ba taun 2019 iya nya RM4.5 bilion.

"Penyampau nya nurun 17 peratus ba taun 2019 enti dibandingka enggau rega eksport RM5.4 ba taun 2018," ku penerang berita Perbadanan Kemajuan Perusahaan Kayu Sarawak (PUSAKA) ti disadung ngagai raban pengarang berita, seharitu. 

Penerang nya disadung ngagai pemberita nyerumba  seminar 'Corporate Liability on Corruption' ti diatur begulai entara STIDC,  GRM Training Sdn.  Bhd. enggau Suruhanjaya Pencegah Rasuah Malaysia, ti dipenyadi Sapit Kepala Menteri ti mega  Menteri Pemansang Mengeri enggau Pengeraja Asal II Datuk Amar Awang Tengah Ali Hassan ba sebuah hotel ditu, seharitu. 

Nitihku penerang nya mega, plywood agi nyadi produk kayu ramu pemadu mayuh ti dieksport Sarawak. Penyampau rega eksport plywood ba taun 2019 iya nya RM2.3 bilion dibandingka enggau RM3 bilion ba taun 2018. Nurun sepenyampau 23 peratus.

Nangkanka plywood iya nya batang (logs) penyampau rega dieksport ba taun 2019 iya nya RM722 juta, papan (RM583 juta), Fibreboard (RM351 juta), chip kayu (RM174 juta) enggau venir penyampau rega dieksport iya nya RM94 juta.

Nambahka nya bisi lima dagang besai endur eksport Sarawak tauka nyual produk kayu ramu ba taun 2019 iya nya Jepun, India, Middle East, Taiwan enggau Korea.

"Jepun agi nyadi palan dagang pemadu besai endur ekport produk kayu ramu Sarawak. 

"Rega eksport ke Jepun ba taun 2019 iya nya RM2.1 bilion iya nya nurun sepenyampau 22 peratus  enti dibandingka enggau rega eksport RM2.7 bilion ba taun 2018.

"Nambahka nya, rega eksport produk kayu ramu iya nya India sepenyampau RM517 juta, Middle East (RM422 juta), Taiwan (RM325 juta) enggau Korea sepenyampau RM248 juta," ku penerang ari PUSAKA.
 

Advertisement