Anda di sini

Angkatka Sibu Jaya nyadi pelilih menua

Advertisement
JIMBAU
JIMBAU

SIBU: Perintah nengeri dipinta ngangkatka Sibu Jaya nyadi pelilih menua baru di nengeri tu.

Ex-Kaban Kaunsil Menua Pesisir Sibu (MDLBS) Jimbau Galau madah, Sibu Jaya ngembuan potensial nyadi siti pelilih menua ke baru laban penyampau tubuh peranak ba kandang menua tu ditu mayuh amat.

“Enggau penyampau tubuh urung 30,000 nyentuk 40,000 iku, Sibu Jaya endang udah patut diangkatka nyadi siti pelilih menua.

“Penyampau mensia ditu endang mayuh ditangkanka enggau mayuh bengkah perengkaguna enggau pemansang ke bukai ti udah bisi disedia tauka benung digaga diatu, Sibu Jaya ngembuan ‘pakej’ ti ckukup nyadi pelilih menua,” ku iya madah ngagai pengarang berita, kemari.

Berebak enggau nya, Jimbau madahka penyauh Sibu Jaya ngagai pasar Sibu urung 28 kilometer lalu tu begunaka pejalaika ke jauh enggau belanja ke besai.

“Manah agi enti Sibu Jaya ngembuan palan servis enggau pekara ti bekaul enggau opis kediri empu sereta nyadi pelilih ti baru, tu mega meri pemaik ngagai rayat menua nya.

“Enti dipeda diatu, Sibu Jaya udah bisi klinik pengerai, balai bomba ke benung digaga, balai polis, sekula, gerija, masjid, librari, dewan, kem soldadu, padang bilun ti besemak enggau ke bukai agi ti benung dikemansangka, ba pengasai aku udah umbas menua tu diangkat nyadi pelilih menua,” ku iya.

Nya alai, Jimbau minta perintah nengeri berundingka peminta tu tauka merati lalu meresa kediri empu potensial  Sibu Jaya tu ngambika ulih nyadi siti pelilih baru, ke mega ulih nambahka pemaik ngagai peranak ba kandang menua tu ila.

Advertisement