Anda di sini

35 iku ketuai komuniti nerima setipikit dichiri ari Residen Sarikei

 Bala Penghulu, Kapitan enggau Tuai Rumah begambar enggau (duduk ari kedua kanan) Edward, Huang, Tan, Christopher, Frederick, Chan enggau bala bukai pengudah tembu pengawa nyauka setipikit nyiri.
KE KENANG: Bala Penghulu, Kapitan enggau Tuai Rumah begambar enggau (duduk ari kedua kanan) Edward, Huang, Tan, Christopher, Frederick, Chan enggau bala bukai pengudah tembu pengawa nyauka setipikit nyiri.

SARIKEI: Bisi 35 iku ketuai komuniti, tuai rumah enggau ketuai genturung pendiau Cina (Kapitan) kandang menua tu nerima setipikit nyiri sida ari Residen Sarikei, Felicia Tan Ya Hua, kemari.

Sekeda sida ti dichiri iya nya tiga iku mangku pengawa Ketuai Komuniti nyadi Penghulu baka Huang Tiong Kang, Teng Wan Neng ke mega deka disambung pengelama dua taun agi sereta Egong Undong (baru dichiri).

Pia mega, bisi 17 iku mangku pengawa Kapitan nyengkaum dua iku baru enggau 15 iku Tuai Rumah ke mega disambung ngagai dua taun agi.  

Ba jaku penerang sebedau pengerami nyuaka setipikit nyiri di Opis Residen ditu, Tan meri tanda basa pengawa enggau tanggungpengawa sereta elawin ninting bulan sida.

Tan ngelalau sida ngambika ransing bejalaika pengawa sereta penuh komitmen, tambah mega, sekeda skop pengawa ti dikereja sida iya nya mantu nyaga pengelantang pendiau komuniti, nyaup bejalaika pengawa rasmi, mantu mutarka penanggul ruang bilik, mantu nerenak penyerakup sereta meransang komuniti regas nyereta program ke diatur Opis Pelilih enggau ejensi bukai.

Kaban Kunsil Nengeri (ADUN) Repok, Dato Sri Huang Tiong Sii ke mega orang ti dikangau datai meda pengerami nya dikena ngingatka ketuai komuniti sentang tanggungpengawa ti besai udah tu ila nengah penyiri sida nya.

Nyadi ketuai redak biak, Huang ngelalau sida bekerejasama rat enggau Opis Pelilih dikena nentuka pejalai projek pemansang enggau mayuh bengkah program meri pemaik ngagai komuniti.

Entara sekeda ke bisi datai iya nya Pemesai Pelilih Sarikei, Christopher Ranggau, Chairperson Kaunsil Pelilih  Sarikei (SDC) Wong Zee Yeng; Temenggong Frederick Wong Kung Kuong, Pemancha Chan Phan Chan enggau  Pemancha Edward Laden.