Dikarang Rengenyan Labang
KOTA SAMARAHAN: Universiti Teknologi Mara (UiTM) Sarawak seruran deka nyaup tauka meri sukung ngagai perambu pemansang perintah nengeri tu.
Rektor UiTM Sarawak Prof Datuk Jamil Hamali madahka, perintah kitai ngaku iya nya kitai patut nguna manah semua peluang ti meri nilai tinggai ngagai ekonomi enggau rama raban bansa.
Peluang tu endang berat dalam kitai nyungkakka penumbuh ekonomi nengeri tu, ku iya.
"Enggau pemesai ti dipebasaka kitai Kepala Menteri (Datuk Patinggi Abang Johari tun Openg), nadai kakang ati kitai nuju ngagai kuing ti betul ngambika setipak enggau menua maju ke bukai.
"Lalu inisiatif Aum Besai Keterubah 'Jalur dan Laluan' 2020 diatur laban kitai semua sedar tauka nemu pemesai guna inisiatif tu dalam menggerakkkan pemansang di nengeri Sarawak baka ti diterangka Kepala Menteri Sarawak," ku iya dalam jaku pengelalu ba pengawa bejadi Aum Besai Keterubah 'Jalur dan Laluan' Antarabansa ti diatur ba UiTM Kampus 2 ditu, seharitu.
Aum besai ti diatur begulai UiTM Sarawak, ACEC Association enggau Beijing Wuzi University dipenyadika Sapit Kepala Menteri Tan Sri Datuk Amar James Jemut MAsing ti ngarika Kepala Menteri Datuk Patinggi Abang Johari Tun Openg.
Jamil madahka aum besai nya nyendiaka jalai ngagai pengempu dagang, kaban akademik, pentadbir, pengaga polisi enggau ke bukai ari institusyen perintah enggai nembai ari institusyen pelajar tinggi belajar bekunsi enggau nempa kaul.
"Kitai patut ngaku iya nya di Asia, pemansang China chukup manah dalam mayuh aspek. China ngembuan pengulih mantu menua Asia ke bukai sama ngerembai enggau sida nyengkaum menua kitai," ku iya.
Aum dua hari nya dipasuk 200 iku pesereta ari beberapa buah menua baka Malaysia, Brunei, China, Filipina, Indonesia, Thailand, Singapura enggau Yaman.
Ba hari keterubah bisi 10 speaker meri keynote bekaul enggau inisiatif 'Jalur dan Laluan' dalam bidang kerejasama pelajr enggau pemansang serantau, lalu ba hari kedua randau 'roundtable' ti nyadi pelasar alai pesereta ari beberapa buah menua betemu sereta berandauka kerejasama meraka garis antarabansa.
Nyerumba aum besai nya, UiTM Sarawak bisi nyain Sempekat Pemereti Ati (MoU) iya nya begulai enggau Sarawak Energy Berhad sereta Clobal China Centre Cultural Service Sdn Bhd.
"Seharitu, kami nyain MoU enggau Sarawak Energy Berhad enggai Global China Centre. Kitai deka nempa mayuh kerejasama bekaul enggau pelajar jemah ila, setipak enggau inisiatif 'Jalur dan Laluan' diterima ulih perintah nengeri," ku iya seraya madahka UiTM udah nyain 10 MoU enggau universiti menua China, sereta lima ari 10 nya disain dalam bulan September 2019.
Sama bisi datai ba pengerami nya, Menteri Pelajar, Sains enggau Pemansik Teknologi Dato Sri Michael Manyin Jawong, Ketuai Pegawai Eksekutif Raban SEB Datuk Sharbini Suhaili, Sapit Rektor Akademik enggau Pekara Antarabansa UiTM Prof Dr Firdaus Abdullah, Konsul General Menua China di Kuching Cheng Guangzhong enggau ke bukai.