KUCHING: Kort Besai seharitu netapka 3 ngagai 5 Februari ke deka datai nyadi hari bulan becharaka kes Petronas ti minta diperesa akim dikena nginsil Notis Penilaian ti ngaul urung RM1.3 bilion dalam Chukai Dagang enggau Servis Nengeri (SST).
Akim Azhahari Kamal Ramli mega netapka 27 Januari tu ila endur nyerahka dokumen kededua ari Petronas enggau perintah nengeri.
Nitihku siku ari luya ti ngarika Petronas, Datuk Malik Imtiaz Sarwar, Kontroler SST nadai ngembuan bidang kuasa enggau ngaga pengilap undang-undang dalam ngemansutka notis cukai jualan ngagai syarikat nya.
Terang iya, sida nadai ngembuan kuasa dalam ordinan cukai jualan, kelimpah ari enda ulih meri chukai dagang ba produk petroleum.
"Perintah nengeri madah sida ulih minta chukai petroleum.
"Tang, Petronas arap bendar iya nya undang-undang nadai ngemendarka chukai nya dipejalaika enggau mansik ngagai konstisusyen enggau undang-undang bukai ti relevan," terang iya ngagai pemberita maya dikerandau ba Lobi Kort Kuching seharitu.
"Nya alai kami enchabar Notis Penilaian nya sereta nyema kami ba endur ke amat, notis nya deka dikinsil enggau nadai peminta deka dipinta ngagai Petronas," ku iya.
Sama ngarika Petronas dalam kes sama tu iya nya luya Alvin Yong.
Kena 10 Disember 2019, Kort Tinggi meri pemendar ngagai syarikat minyak nasional nya ngambika minta diperesa akim dikena nginsil Notis Penilaian nya.
Kort Tinggi dalam pekara tu mega meri pemendar ngagai Petronas minta diperesa akim dikena ngenukuka sekeda seksyen dalam Ordinan Cukai Jualan Negeri Sarawak nyadi 'ultra vires' ngagai Konstitusyen Perintah Besai.