Anda di sini

Inisiatif 'Jalur dan Laluan' antarabansa pelasar nyerukai market baru di China

Masing disempulang Jamil (kiba)  betabi seraya betanya berita ngagai pesereta aum besai nya lebuh ngarika Abang Johari bejadika aum besai keterubah 'Jalur dan Laluan' Antarabansa, seharitu. - Gambar Muhamad Rais Sanusi

Dikarang Rengenyan Labang

KOTA SAMARAHAN: Kepala Menteri Datuk Patingi Abang Johari Tun Openg bepenemu nengeri tu deka bulih penguntung tauka pemanah enti masuk ngagai dagang baru China nengah inisiatif aum besai keterubah 'Jalur dan Laluan' antarabansa.

Inisiatif 'Jalur dan Laluan' iya nya strategi pemansang ti beguna dipenyadi perintah China ti enggau juluk dikena meransang kerejasama ekonomi entara menua sepemanjai 'Jalur dan Laluan' ti diperambu, ku iya.

Ku iya inisiatif nya udah disetipak kena ngangkatka 'free-flow' faktor ekonomi ti berurun enggau nentuka sumber ke patut ti efisyen kelimpah ari dikena ngangkatka integrasyen dagang enggau nempa langkar kerejasama ekonomi serantau ti meri penguntung tauka pemanah ngagai semua ti ngambi bagi.

Tu deka mai peluang baru ngagai semua ke ngambi bagi ti diperansanng ulih 'flow of capital', barang engau servis entara Asia enggau ke bukai nengah integrasyen dagang enggau penumbuh kaul baru entara komuniti, nempa dagang serata dunya.

"Sarawak deka bulih penguntung tauka pemanah enti kitai masuk dagang baru ti asil ari inisiaitf tu.

"Deka bisi akses ti lebih manah ngagai market China enggau menua bukai di ASEAN, Timur Tengah sereta dagang Central and Eastern European.

"Tu deka pulai ke untung dikena ngemaju enggau ngemansangka ekonomi dalam bidang tu baka beranakkka puku enggau dagang deka ngeyampatka pemansang," ku iya.

Abang Johari mansutka pekara nya ba jaku iya ti dibacha Sapit Kepala Menteri ti mega Menteri Infrastruktur enggau Pemansang palan Penyangkai Kapal Tan Sri Datuk Amar James Jemut Masing ti ngarika iya bejadi aum besai keterubah 'Jalur dan Laluan' Antarabansa (ICBR) 2020 ti diatur ba Universiti Teknologi Mara (UiTM)  Sarawak,  ACEC Association enggau Beijing Wuzi University ba UiTM Kampus 2 ditu, seharitu.

Nambahka nya Abang Johari madah nengeri tu begunaka kerejasama institusyen menua luar nengah pengawa pemansik enggau pemansang awakka ukih terus maju. 

Perintah nengeri tu semina bisi siti fokus besai iya nya ngemansangka Sarawak sereta nengah aum besai ti baka tu nengeri tu deka ulih nyapai juluk nya, ku iya.

Iya madahka mayuh penanggul nagang lebuh deka mai ekonomi nuju ngagai tikas ti lebih tinggi enggau maya deka mai raban bansa nuju ngagai penatai pemisi tinggi.

Nengeri tu ku iya begunaka bantu sereta orang ti pandai enggau bepenemu ari menua luar, begunaka institusyen pelajar mantu ba pengawa ngemansangka modal mensia sereta institusyen tu ulih gawa enggau syarikat bukai tauka bakih sida ari dalam enggau luar menua. 

Kerejasama enggau institusyen menua luar nengah pengawa pemansik enggau pemansang deka mantu Sarawak nyingkang ke mua, ku iya.

"Ngemansangka nengeri besai baka Sarawak tu tanggungpengawa besai. Kami ngaga tauka ngemansangka enggau pengabis manah ke ulih enggau nyingkang sepengelengkas ke ulih ngambika ulih setipak enggau serata menua enggau dunya.

"Nengah atur tauka aum ti baka tu, kami ulih bejalai sereta ngelakuka kerejasama enggau betukar main asal sereta pelajar entara China, Malaysia enggau menua 'Jalur dan Laluan' ke bukai.

"Kami mayuh orang pandai enggau bepenemu di nengeri tu lalu enti sida senda ngambi bagi dalam pengawa ngemansangka nengeri kitai, kitai deka betapi enggau penanggul.

"Mayuh peluang ke bedau diserungkai dalam projek 'Jalur dan Laluan' ke ulih dikena ngemansangka ekonomi kitai," ku iya. 

Iya ngarapka nengah projek Opis Menteri Dagang Temuai, Seni enggau Main Asal, Sarawak Convention Bureau enggau Opis Menteri Pelajar, Sains enggau Pemansik Teknologi kitai ulih bekerejasama enggau 'stakeholders' nengah platform baka aum besai tu.

Sama bisi datai ba pengerami nya Menteri Pelajar, Sains enggau Pemansik Teknologi Dato Sri Michael Manyin Jawong, Rektor UiTM Sarawak Prof Datuk Dr Jamil Hamali; Konsul General Menua China ke Kuching Cheng GuangZhong; Ketuai Pegawai Eksekutif Raban Sarawak Energy Berhad Datuk Sharbini Suhaili enggau ke bukai.