KUCHING: Sarawak nengeri keterubah di Malaysia deka ngatur ‘Program Rintis Intervensi Kesihatan Mental’, ti deka diatur di Bintulu dalam bulan Februari 2020.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, program nya deka diatur Kaunsil Pemansang Sosial Sarawak (MPS) enggau kerejasama Gerempung Pengerai Malaysia (MHA) enggau ke bukai.
“Program Rintis Intervensi Kesihatan Mental deka diatur di Bintulu dalam bulan Februari pengudah Taun Baru China, lalu program tu dibagi ngagai tiga komponen iya nya Mental Health First Aid Course; Gatekeepers’ Suicidal Prevention Training enggau Communiti Mental Health Literacy.
“Kelimpah ari nya, Sekretariat Mendam MPS mega deka ngatur program ‘Wacana Bestari’, Isu Pengerai Runding di Miri nyerumba nyambut Bulan Pengerai Runding taun 2020 ba bulan Oktober.
“Sekretariat Tetap MPS deka neruska kerejasama enggau MHA dalam pengawa ngiri penemu enggau penyedar ngagai komuniti menua pesisir pasal isu pengerai runding nengah Program Randau Pemansang Sosial ti diperambu bisi 24 siri ba taun 2020,” ku iya ti mega Chairman MPS madah ngagai pengarang berita, kemari.
Fatimah dulu ari nya nyadi chairman aum kaban MPS Bil.1/2020 ti diatur MPS ba Wisma Bapa Malaysia ditu.
Nitihku iya ba taun MPS bisi ngatur lima program rintis di Sarawak iya nya Program Mental Health First Aid; raban mit berandauka pasal isu pengerai runding; servis kayncil ari Gerempung Pengerai Runding Sarawak; Program begulai enggau komuniti menua pesisir ti datur MPS maya Randau Pemansang Sosial kelimpah ari Program Mental Health Literacy.
Berebak enggau tu ditanya bekaul enggau isu pengerai runding ba nengeri tu, iya madahka Sarawak bisi ngayanka penyampau orang ti bisi penanggul pengerai runding ti tinggi nyengkaum di menua pesisir.
Bepelasarka Pansik Pengerai enggau Morbiditi Menua (NHMS) ti dipejalaika Opis Menteri Pengerai Malaysia ba taun 2015 ku Fatimah, tetemuka satu (1) ari tiga (3) rayat Malaysia betapi enggau penanggul bekaul engau pengerai runding engau 29.2 peratus ari nya iya nya raban beumur 16 taun ke atas.
“Sarawak iya nya ba penuduk ke-4 di Malaysia. Prevalen bekaul enggau pengerai runding di Sarawak iya nya 35.8 peratus enggau pemadu tinggi ba peranak Bumiputera Sarawak di menua pesisir, ti beumur 16 taun ke atas.
“Sarawak mega ngerikod peratus ti ngirauka ba raban anak mit beumur ari baru 15 taun, iya nya 16.0 peratus,” ku iya ti ngenang sekeda statistik bekaul enggau penanggul pengerai runding.
Kelimpah ari nya, ba Sarawak, bisi 28 iku Pakar Psikiatri ti nyengkaum 22 iku ba sepital perintah, tiga iku ba sepital peribit enggau tiga iku ba UNIMAS.
Bisi semilan buah sepital ke bisi servis Pakar Psikiatri iya nya Sepital Sentosa (6), Sepital Besai Sarawak (5), Sepital Serian (3), Sepital Sri Aman (1), Sepital Sibu (1), Sepital Miri (2), Sepital Bintulu (2), Sepital Kapit (1) enggau Sepital Limbang (1).
Sama bisi ba aum pengarang berita, Menteri Muda Orang Indu, Ruang Bilik enggau Pemansang Nembiak Mit Rosey Yunus; Menteri Muda Pengelantang Raban Bansa Datuk Francis Harden Hollis; Sekretari Mendam Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dr Saadiah Abdul Samat enggau Sekretari Ekesekutif MPS Dr Zufar Yadi Brendan Abdullah.