KUCHING: Bisi 68 iku raban pengari ari Bagi Menua Serian betuaika Pemesai Opis Kunsil Tebedu, Raymond Acheh nemuai ngagai menua Indonesia ngulu Pengerami Malam ‘Titian Muhibbah’ 2019 ti diatur di Kota Sanggau, Kalimantan Barat ujung minggu nyin tadi.
Sida disambut manah Sapit Bupati Sanggau Dr Johaness Ontot, Entikong Camat (Pemesai Pelilih Menua) Hendrikus Suparman, Pengari Menteri Adat Asal Indonesia , Ketuai Opis di Sanggau enggau bala ketuai komuniti di menua nya.
Achen madah, iya berasai gaga ati meda pengerami begulai tu diatur ke-14 kali bejurut lalu tu mandangka kaul ti rat entara Bagi Menua Serian enggau pemerintah Indonesia di Sanggau.
Batang tuju pbgerani tu iya nya betukar main asal, ku iya seraya madahka pengerami ninting tu ke bendar dikena ngeratka tanggam kaul kelebih agi ari raban sida ti kereja sereta diau semak enggau garis entara menua Malaysia enggau Indonesia.
“Kaul ti rat entara Serian enggau Sanggau ngemudahka kaul kereja kelebih agi ba kompleks ICQS ( imigresyen, kastam, kuarantin enggau pengelikun) ba Tebedu (ari Malaysia) enggau Entikong (ari Indonesia),” ku iya madah lebuh dikerandau nengah telefon.
Achen madahka raban pengari ari Serian nya mega bisi mantaika main asal sida ba pengerami nya. Dua iku melaki bini iya nya Morgan enggau Jenny mega bisi nyadaka beberapa iti lagu Bidayuh maya nya.
Raban pengari ari Serian nya diarika staf ari Opis Residen Serian, Opis Pelilih Menua Tebedu, Opis Mit Pelilih Menua Siburan, Ketuai komuniti Tebedu enggau raban ke betanda ari Kaunsil Seni Sarawak.
“Taun nyin tadi , pengerami nya diatur di Tebedu, taun baru, gintir kitai nyadi pengatur pengerami nya,” ku iya nambah.