Anda di sini

Komuniti Kristian di Sarawak ngarapka kemisi Hari Krismas ditambah sehari

Advertisement
 Henry dikerandau pengarang berita ba aum media di Dataran Bazaar Krokong di Bau kemari.
MERI PENERANG: Henry dikerandau pengarang berita ba aum media di Dataran Bazaar Krokong di Bau kemari.

BAU: Komuniti Kristian ba nengeri tu ngembuan pengandal ti tinggi ngagai perintah Sarawak nambahka kemisi sehari agi beserimbai enggau pengerami Hari Krismas.

Taja pia ku Kaban Kunsil Nengeri (ADUN) Tasik Biru, Datuk Henry Harry Jinep, nambah pemisi sehari nya bepanggai ngagai perintah Sarawak.

"Kami ngembuan pengandal ti tinggi kelebih agi komuniti Kristian. Enti Sabah bulih peluang pemisi nya, kami mega ngarapka pekara ke sama.

"Tang pekara tu meseti dirunding dalam kabinet. Hari siti ni ti patut dipilih, 24 hari bulan tauka 26 hari bulan Disember, kitai nadai nemu.

"Bisi orang deka ke 24 hari bulan dikena nyendiaka diri ngintu pengerami nya. Bisi ti deka ke 26 hari bulan. Pekara tu bepanggai ngagai perintah," ku iya madah ngagai pengarang berita ba aum media di Dataran Bazaar Krokong ditu kemari.

Dulu agi ari nya Henry bejalaika pengawa matau pengawa nyikap diri beserimbai enggau Pengerami Nyuaka Geran Tanah enggau Pengerami Nyerahka Blue Print sereta Pengawa Ngemunka Gabungan Parti Sarawak (GPS) Zon 4A ba palan nya.

Berebak enggau tu Sabah nengeri keterubah nambah sehari agi pemisi  beserimbai enggau pengerami Hari Krismas ti diintu tetiap 25 Disember.

Kemisi pengelama dua hari iya nya kena 24 enggau 25 Disember dipadahka Kepala Menteri Sabah, Datuk Seri Mohd Shafie Apdal kena malam Hari Tiga di Kota Kinabalu.

Beserimbai enggau nya, Henry pechaya Kepala Menteri Datuk Patinggi Abang Johari Tun Openg siku orang ti positif enggau nama pan pengandal ari rayat iya.

Ambika chunto, pemeri bantu sepenyampau RM500 diungkup ngagai pengereja pengawa perintah besai ba nengeri tu, Henry pechaya Kepala Menteri enda ngelebuka pengandal rayat iya.

Nya alai ku Henry, rayat nengeri tu meseti pechaya ngagai Kepala Menteri lalu seruran nyukung iya sereta parti ti dipegai iya nya Gabungan Parti Sarawak (GPS) ngambika terus megai Sarawak nyentukka ulih nyapai juluk 2030.

Advertisement