KUCHING: Perambu nyual aset kompeni Petroliam Nasional Berhad (PETRONAS) tau ngachau randau bekaul enggau minyak enggau gis di nengeri tu ti benung dipejalaika Perintah Sarawak enggau perintah besai.
Pekara nya dipadahka Menteri Dagang Temuai, Seni enggau Main Asal Datuk Abdul Karim Rahman Hamzah ti madah, perintah besai patut baum nya sebedau madah juluk deka nyual aset PETRONAS nya.
“Kitai benung berandau entara Perintah Sarawak, besai enggau PETRONAS bekaul enggau minyak enggau gis di nengeri tu.
“Nyadi, aku enda tentu nyengala sekalika kitai agi berandau, aset enggau ke bukai udah berengkah deka dijual, iya deka meri empas ngagai randau tu,” ku iya.
Iya mansutka jaku nya ba aum pengarang berita pengudah pengawa nyerahka ‘jubah’ Tan Sri Sulong Matjeraie ba bilik baum opis menteri iya di Begunan Baitulmakmur ditu kemari.
Nambahka nya, Abdul Karim ti mega Menteri Nembiak enggau Lumba enggau Main nerangka, perintah nengeri mega enda tentu arapka bidang kuasa Akta Pemansang Petroleum 1974 (PDA) iya nya PETRONAS ditumbuhka ari baruh undang-undang ti digaga maya menua siga suba.
Terang iya, pengudah akta menua siga dipadamka, status PDA enda tentu ulih dikearapka ke alai nya begunaka kort ngaga pemutus.
“Undang-undang nya (PDA) digaga maya menua siga lalu perintah nengeri enda dipadahka laban enda ngira nama pekara ti deka dipejalaika bekaul pengeraja asal di nengeri mesti dibai sereta dipesetuju ari perintah nengeri nengah Kunsil Nengeri (DUN).
“Tang akta menua siga tu udah dipadamka lalu lebuh dipadamka status kompeni enggau sekeda organisasyen ti digaga nengah undang-undang menua siga tu kitai bedau ulih nentu tang engka kort ti ulih nentuka,” terang iya.
Berindik ari pekara nya, iya ngarapka randau entara Perintah Sarawak enggau perintah besai ulih diputarka dulu.
“Randau bedau diputuska, anang mih aset dijual, tu ulih ngemarka agi randau kitai.
“Pengudah semua diadu enggau manah aku pechaya ulih diatur ngambika diberi ngagai nengeri-nengeri tang nya mesti dikerandauka dulu begulai enggau perintah nengeri laban semua tu patut dipeda enggau silik dulu sebedau dipajakka,” ku iya.
Kena Hari Tiga, Perintah Terengganu sedia berandau ngempu ekuiti dalam PETRONAS, tang patut meda penyampau ti patut tauka pengulih duit nengeri.
Menteri Besai, Datuk Seri Dr Ahmad Samsuri Mokhtar, madah, Perintah Terengganu nadai duit galau ke mayuh baka Sabah enggau Sarawak, ti bisi tatak beranakka puku baka nya.
Iya madahka, ke diatu sida iya apin nerima sebarang penerang rasmi ari perintah besai enggau PETRONAS bekaul enggau ruan dau nyual aset minyak nya ngagai nengeri ti bisi palan alai ngulihka minyak enggau gis.
Sebedau tu, Menteri Besai Tun Dr Mahathir Mohamad diberitaka madah, perintah berunding deka nyual aset PETRONAS ngagai nengeri endur minyak enggau gis kompeni minyak nya, benung bebendar ngumpul duit dikena mayar utang.
Ku iya, chara nya deka meri peluang ngagai nengeri baka Sarawak enggau Sabah sama ngambi bagi dalam PETRONAS, iya nya kompeni pengeksport gis lela asal ketiga pemadu besai di dunya.
Iya madah, perintah enda ulih nangkup tauka ngamatka peminta royalti sepenyampau empat kali lipat nengeri pemansut nya ti sama enggau 20 peratus penguntung kompeni.
Sabah enggau Sarawak ngembuan rizab minyak enggau gis pemadu produktif ba Laut China Selatan.
Peminta sida nikika royalti ulih ngujungka PETRONAS mayar nyentuk ke AS$7 bilion(RM29.15 bilion) setaun.
PETRONAS tauka Petroliam Nasional Bhd iya nya ngemansut duit ke pemadu mayuh ngagai perintah besai.
Unit saham dalam lis besai kompeni tu iya nya pengaga petrokimia, Petronas Chemicals Group, Petronas Dagangan enggau infrastruktur gas enggau utiliti, Petronas Gis lalu Petronas Carigali iya nya unit ngiga minyak enggau gis.