Anda di sini

Bajet 2020 mayuh meri peluang dalam program pemansang

Advertisement
 Dennis bejadi gelanggang futsal di Long Latei.
BEJADI: Dennis bejadi gelanggang futsal di Long Latei.

MIRI: Bajet 2020 perintah nengeri mayuh meri peluang ngagai peranak di menua pesisir nyengkaum di Telang Usan enggau ba program pemansang.

Berebak enggau nya, Dennis Ngau minta peranak dalam sitak iya ngena memanah ungkup belanja ti diberi nya sereta berani nyerungkai peluang baru.

“Kita patut malutka diri sereta ngiga peluang dalam pejurai bajet nengeri Sarawak taun baru ti sama bisi ngaul raban bansa Penan dalam bidang betanam betupi, industri dagang temuai enggau pemansang menua pesisir.  

“Aku pechaya nengah pengulih,pengering enggau aset sereta runding positif rayat menua pesisir ulih mujur dalam semua bidang enggau industri,” ku iya lebuh bejadi gelanggang futsal enggau panggau besai  padang bola sepak di rumah panjai Long Latei dekat ditu ensanus.

Ku iya, perintah nengeri nyendiaka perengkaguna tang tepulai ngagai individu beambi ulih ari nya.  

Ku Dennis, peranak menua pesisir mayuh penau kelebih agi raban nembiak ngena pengering sida ngangkatka tikas pengidup sida.  Ku iya baru, sida dia patut nemu ngerebut peluang ba maya ke betul laban nya ukai datai tau datai pia aja ba mua sida.

Berebak enggau nya, Dennis meransang raban bansa Penan anang malik ke belakang sereta anang mudah tepejuh runding ngagai orang ti minta sida  enda nyukung perintah Sarawak.  

“Ulah ke baka nya semina deka ngasuh kita jauh tinggal ari pemansang. Nya alai, perintah nengeri ari baruh Gabungan Parti Sarawak (GPS) deka nentuka semua kandang menua ngasaika pemansang ba juluk nyapai status nengeri maju sereta bepenatai pemisi  tinggi,” ku iya.

Ku iya,ari baruh iring Keplaa Menteri Datuk Patinggi Abang Johari Tun Abang Openg, Sarawak arap endar ulih nyapai juluk nya nengah chara bejalaika sekeda program pemansang.  

Berebak enggau,dua projek udah dikemendarka Dennis ari bawah bajet Projek Transformasyen Menua Pesisir (RTP) taun tu.  

Ku Dennis, gelanggang futsal ti keterubah endar digaga ba palan pengentap berumah baru Penan ba sitak iya.   

Ku iya, perengkaguna nya pemeri perintah nengri dikena ngangkatka tikas pengidup peranak di Long Latei.

“Aku ngarapka nengah pemisi gelanggang futsal tu ulih nerenak pengerindu peranak Penan dalam bidang lumba enggau main kelebih agi main bol ngambika sida regas agi,“ ku iya.  

Sentang Palan Servis bansa Penan, nya disediaka ba tiga endur di Telang Usan ke nyadi palan aktiviti raban bansa Penan kelimpah nyadi palan begempuru endur negapka kaul sida enggau raban bansa bukai ke diau ngelingi sida.  

Dulu ari nya, chairman pengatur ke mega ketuai nembiak Long Latei, Lawai Marcus minta raban nembiak terus meri sukung ngagai Dennis enggau perintah Sarawak.

“Nyadi pengari rayat, Dennis mujur mai  pemansang ngagai menua kitai nyengkaum endur bukai di Telang Usan,” ku iya.

Kelimpah Long Latei, pemansang mega digaga ba lebih 80 rumah panjai enggau palan pengentap baru dalam sitak nya.  

Lebih 300 peranak nyengkaum SAO Opis Pelilih Telang Usan, Mac Aurther, Ketuai Nembiak PBB Telang Usan, Kunsilor Dominic Nyurang enggau Penghulu Juwin Jihan bisi ngulu pengerami nya.

Advertisement