Anda di sini

Anang enda ngemeratka pengerai maya musim pengujan

Advertisement
ARRAHMAN
ARRAHMAN

KANOWIT: Peranak ti diau di kandang menua ti suah ampuh bah dilalau ngambika mindah tumu agi dikena nyeliahka pekara ti dikenggai nyadi.

Ketuai Opis Bomba enggau Penyelamat Kanowit Arrahman Chik madah, peranak ti suah napi penusah ampuh bah ninting taun maya musim pengujan tu dilalau ngemeratka pekara tu sereta mega ari sukut pengelikun enggau pengerai.

Berindik ari nya, iya nangkan peranak ti dituntung penusah ampuh bah lalu ti disuruh mindah ngambika lengkas mindahka diri lalu enda mayuh kelukih.

“Peranak patut seruran bejejaga lalu nitihka jaku tangkan raban penerit adat sereta apai indai meseti seruran matau pengawa anak sida lalu enda nyadika ampuh bah nya ke pesta bemain ai.

“Sida ti dipinta mindah, anang nikal pulai ke rumah laban nya ulih ngenataika penanggul maya operasyen nyelamat,” ku iya lebuh ti ditanya pengarang berita kemari.

Nitih ku Arrahman, sida ti tasah dituntung penusah ampuh bah ti disuruh mindah dilalau ngambika nyimpan dokumen ti beguna ba palan ti likun lalu nutup semua suis elekterik.

Bekaul pengawa nyikap diri raban bomba, Arrahman madahka sida udah disuruh seruran matau kandang menua ti ditemu suah ampuh bah.

Tu dikena ngemuntangka operasyen nyelamat kelimpah ngaga pengawa matau dikena nentuka kandang menua ti jampat ampuh bah.

Ku iya madah, kandang menua ti selalu ampuh bah endang patut ditemu dikena ngulihka penerang ngambika pengawa nyelamat ulih digaga enggau lengkas nyema bisi nyadi ambuh bah tunggal.

Entara kandang menua ti suah dituntung penusah ampuh bah iya nya Sekula Primari (SK) Nanga Balingiau, SK Ulu Poi, SK Ulu Machan, semanjai Sungai Poi, Klinik Pengerai Menalun enggau rumah panjai di semanjai kandang menua Menualun enggau Sungai Poi.

Ku iya,  peranak di kandang menua ti suah napi penusah ampuh bah ditangkan ngambika ngeripot penusah nya ngambika nyamai ngatur pengawa nyelamat.

Advertisement