SIBU: Presiden Parti Progresif Demokratik (PDP) Datuk Seri Tiong King Sing ngelalau pengundi ngambika bejejimat enggau chalun ‘talam dua mua’ ti semina bemainka sentimen politik, semina ketegal deka ngulihka undi.
Beejaku ngagai peranak Rumah Umpang, Manyan maya sesi randau begulai enggau rayat kena Hari Minggu nyin tadi ku iya, pengudah pengawa bepilih tembu, chalun ke baka nya lesap enggau semaya sida sereta enda gawa ke rayat agi.
“Nya kebuah aku minta peranak rumah panjai bejejimat enggau chalun ke baka tu laban kita dekaka pemansang di menua kita.
“Enda salah kita bulih pemaik tauka penguntung lebih, tang anang kelalu amu ke pemaik ungkup timpuh ke pandak sereta ngelengkaka pemansang ke manah agi.
“Aku mega ngarapka peranak rumah panjai terus besaup sereta berandau enggau tuai rumah sentang sebarang penanggul enggau isu di rumah panjai ngambika semampai ulih likun sereta beserakup,” ku iya.
Tiong ke mega Kaban Parlimen Bintulu madah, sayau amat enda mayuh kaban politik diatu ke endang amat deka gawaka rayat ba sitak sida.
Kaban politik diatu ku iya, nadai tanggungpengawa sereta ngemendarka kimpin nuju penyarut ti ngenusahka rayat ngambika mida entara chelum enggau burak dikena ngemanjaika agenda sempit runding ti beratka diri empu aja.
“Pengudah perintah diatu megai kuasa, nadai ubah nyadi kelimpah ari charut dalam parti ti ngujungka rayat napi penusah sereta enda dikeibuhka.
“Utai ti dikedeka rayat enda dikebuh ketegal barat agi ke politik ti nadai meri pemaik ngagai rayat Sarawak.
“Ketegal nya mih kami numbuhka Gabungan Parti Sarawak (GPS) dikena ngetanka hak kitai, kelimpah negika pengelantang pendiau rayat di nengeri tu,” ku iya nyemetak.
Iya mega madahka gaya rumah panjai diatu majak moden, lalu enda mayuh agi rumah panjai ti digaga ari kayu.
“Ambika Chunto ke ulih dipeda kitai iya nya Rumah Umpang ke alai rumah digaga nengah polisi bebatak asur sereta penyerakup peranak rumah panjai nya empu,” ku iya.