Anda di sini

Tiga RRCs deka ditumbuhka JPS

 Alvin (kiba) nyuaka tepa sayur ti ditanam ba kompos kulit rian  ngagai Dr Abdul Rahman ti udah bejadika ROPM 2019, kemari. — Gambar Tan Siong Wei
TEPA: Alvin (kiba) nyuaka tepa sayur ti ditanam ba kompos kulit rian ngagai Dr Abdul Rahman ti udah bejadika ROPM 2019, kemari. — Gambar Tan Siong Wei

KUCHING: Tiga Palan Mansik Kandang Menua (RRCs) di nengeri tu benung dalam proses ditumbuhka Opis Betanam Betupi Sarawak (JPS).

Pemangku Direktor JPS, Dr Alvin Chai Kuet Lian madah, tuju RRCs nya dikena mindahka teknologi pemansut utai tanam ke patut ngagai ke bisi pemerat ba pekara nya.

“Opis benung dalam proses numbuhka Palan Mansik Kandang Menua (RRCs) di Betong ungkup Kandang Menua Selatan, Sibu ungkup Kandang Menua Tengah enggau Miri ungkup Kandang Menua Utara.

“Batang pengawa RRCs tu iya nya mindahka teknologi pemansut utai tanam ti patut ngagai ke bisi pemerat ba pekara nya ba kandang menua diri empu.

“Nya alai, sekeda Pemesai Pemansik ba Palan Pemansik Betanam Betupi Semongok ke diatu deka dianjung ngagai tiga RRCs tu,” ku iya.

Alvin mansutka pekara nya dalam jaku pengelalu iya  maya Research Officers’ Progress Meeting (ROPM)2019 ti diatur Opis Betanam Betupi Sarawak ba sebuah hotel ditu, kemari.

ROPM 2019 ti diatur pengelama tiga hari nya dipenyadi Menteri Muda Betanam Betupi Moden, Tanah Adat enggau Pemansang Kandang Menua Datuk Dr Abdul Rahman Ismail ti ngarika Sapit Kepala Menteri Datuk Amar Douglas Uggah Embas.

Kelimpah ari nya, Alvin mega deka ke pegawai pemansik beratika “applied research” ti dikearapka ulih mantu orang betanam betupi, orang dagangagro enggau orang bukai bisi pemerat ba pekara nya.

“Berengkah taun baru, aku deka ke pemesai pemansik kitai ninjau “applied research”, ti fokus ngagai pengawa mutarka penanggul enggau pemar ke ditapi orang betanam betupi, orang dagang agro enggau orang bukai ti bisi pemerat ba pekara nya.

“Aku deka ke pemesai pemansik kitai ngena prinsip enggau chara baka ke dibaruh tu ba pengawa ngelanggur enggau bejalaika program pemansik.

“(Prinsip enggau chara) Baka ngurangka pengawa pemansik ti enda dipegulai enggau utai bukai; ngemeran enggau ngenipakka teknologi ke endang udah bisi sereta pemansik ke ditemu; seliahka ari nandu pansik dikena ngelimat pemansut enggau sekeda ke bukai,” ku iya.

Alvin madah asil pansik patut ulih diubah ngagai aksyen awakka ulih meri penguntung ngagai orang betanam betupi ,mega entara prinsip enggau chara ke patut dikemeranka.

Nambahka nya iya meransang JPS gawa rat enggau opis pampang sereta bagi menua kelebih agi bekaul enggau utai tanam, ngerembai enggau Industri Bumai enggau Bekebun (IAT).