Anda di sini

Sani: Kerembaika kaul pengudah ngerejista diri ba palan pelajar tinggi

MUKAH: Nembiak baru diansak ngembuan pengerembai kaul pengudah ngerejista diri ngagai palan pelajar tinggi.

Sapit Direktor Akademik Politeknik Mukah (PMU) Sani Said madah, pekara nya dipelaba ulih mantu sida sekumbang ke belajar ba endur nya.

“Kena mih peluang maya program ‘Minggu Inspirasyen Siswa’ tu dikena ngerembaika kaul baru,” ku iya maya Pengerami Bejadi Minggu Siswa PMU renggat bulan Disember 2019 kemari ba Dewan Kuliah PMU.

Dikena nyapai juluk diri empu, bala nembiak patut nitihka semua atur enggau undang-undang ke udah ditetapka PMU.

Sida mega patut nemu, diatu maya transisyen ti berubah ari nembiak sekula nyadi nembiak palan pelajar tinggi.

Nya alai, nembiak dilalau ngambika pintar mai diri lebuh ti jauh ari diri sebilik sida.

Tama ngagai palan pelajar tinggi ke baka tu mega siti ari ke pilih diri empu kelimpah siti penentu ba pengidup jemah ila.

PMU mega lantang ati laban dipilih bala nembiak nyadi siti palan pelajar tinggi ke endur nampung pelajar.

Dikearap juluk ati bala nembiak ulih dijapai dudi ila.

Bisi 178 iku nembiak udah ngerejista ungkup renggat Disember 2019 lalu dipelaba deka terus dipejalaika nyentuk ngagai ujung bulan tu.

Sama bisi datai iya nya Sapit Direktor Penyukung Akademik PMU Iskandar Reduan.