Anda di sini

Pengarang berita di Miri diperansang ngemeranka standard profesionalisme

 Lee (duduk ba baris tengah, enam kanan) begambar enggau bala temuai.
KE ALBUM: Lee (duduk ba baris tengah, enam kanan) begambar enggau bala temuai.

MIRI: Pengarang berita di bagi menua tu patut berat agi ngemanahka standard profesionalisme sida.

Menteri Perengka Pengangkut, Datuk Lee Kim Shin ngarapka ulih meda pengarang berita di Miri ngemeranka standard jurnalisme ke manah lalu ngembuan etika  enggau tanggungpengawa, laban nya besai amat guna.  

“Pengarang berita ti ngembuan tanggungpengawa, etika sereta positif ulih mantu nempa raban bansa ke meruan agi.   Nya kebuah, aku deka meda pengarang berita ditu majak ngemanahka standard profesionalisme sida,” ku iya.

“Nyema bisi pematut ngatur tauka enggau ba barang bagi kus tauka latih, kami ulih ngatur nya. Enti kita deka ngemanahka fotografi kita, kami mega ulih ngatur kus fotografi ke kita semua.

“Nya alai, padah ngagai aku lalu meda nama ke ulih dibantu aku ngagai kita dikena ngangkatka standard kita ti nyadi pengarang berita, lalu baka ti suah dikemeratka aku, semua  pengarang berita mangku tanggungpengawa ke beguna amat ba rayat enggau menua, kelebih agi ba sukut pemansang rama sereta ngelakuka utai ke manah ba mensia mayuh,” ku iya.

Lee ke mega Kaban Kunsil Nengeri Senadin bejaku munyi tu lebuh ke bejadi Pengerami Makai Lemai Meri Terima Kasih ngagai Media ti berambaika leka jaku “Together for Better Tomorrow” ti diatur begulai Grand Palace Hotel enggau Palan Servis Rayat N75 DUN Senadin, kena malam Hari Satu tu tadi.

Lee ngelalau pengarang berita seraya madahka ripot berita ke positif ulih mantu mai ubah ngagai raban bansa.

“Kita semua udah bejalaika pengawa kita ngelakuka Miri. Aku agi ingat suba sebedau kami ke Miri, kami suah minta kerejasama aei pengarang berita ngambika nulis berita sentang Miri enggau perambu ngangkatka Miri ngagai status mengeri besai.

“Lalu pengarang berita Miri udah bejalaika pengawa sida enggau manah lebuh ti nulis pasal Miri, pemansang Miri enggau potensial nyadi mengeri besai. Pengujung iya, nengah sukung ari semua nyengkaum pengarang berita kita, Miri bulih status nyadi mengeri besai kena 20 Mei taun 2005,” ku iya.

Ngena peluang tu, Lee ngenataika pengaga ati iya ngagai raban berita ti u dah bejalaika pengawa sida enggau manah,lalu arapka ba taun ti deka datrai sida majak bejalaika pengawa enggau manah sereta nyaup mai mayuh agi peluang enggau ubah ngagai mengeri Miri.

“ Aku udah bisi kaul enggau Serakup Pengarang Berita Utara Sarawak (NSJA) kenyau ditumbuhka 45 taun ke udah nyentuk ke diatu. Aku gaga ati meda NSJA majak tegap sereta udah meri bantu ti positif ngagai raban bansa sereta ngenanka profesionalisme ba pengawa ngarang berita ,” he ku iya.

Berebak enggau nya, presiden NJSA Andy Jong meri teri kasih ngagai Lee enggau kaban komiti pengatur laban udah ngatur pengerami makai lemai nya sereta nyukung serakup nya ngelama tu.  

“Aku arapka malam meri terima kasih ngagai media tu ulih nyendiaka platform dikena ngempuru mayuh bengkah organisasyen media seraya lantang ati ngelakuka kaul sereta komunikasyen enggau pangan diri.

“Aku arapka kami ulih ngenanka kerejasama rat sereta kaul enggau pangan dri jemah ila,” ku iya.