Anda di sini

Nyabong bebulaka berita ti madah iya enda ngenanka kerusi maya PRN ila

 Bediri enam ari kiba Tuai Rumah Ngidang Minggat, Nyabong enggau pemesai Pelilih Kapit Cerisologo Sabut.
BEGULAI ENGGAU RAYAT: Bediri enam ari kiba Tuai Rumah Ngidang Minggat, Nyabong enggau pemesai Pelilih Kapit Cerisologo Sabut.

KAPIT: Kaban Kunsil Nengeri (ADUN) Pelagus Wilson Nyabong Ijang udah nemuai ngagai Rumah Ngidang Anak Minggat sepemanjai Jalai Rantau Panjai, Sungai Bena, Sut, Baleh, bedau lama ti udah.

Pemesai Pelilih Kapit Cerisologo Sabut, Penghulu Daniel Dian, bisi 15 iku bala Tuai Rumah ari Jalai Antaroh enggau Sungai Bena, kaban komiti Parti Rayat Sarawak (PRS) Raban Nembiak enggau Sayap Indu entara ke bisi nemuai ngagai Rumah Ngidang.

Bejaku ba pengerami nya, Nyabong madahka bisi sekeda raban ke bejalai ngelingi Pelagus nyadung berita bula pasal iya. Raban ti betenah ke iya nya ngembuan juluk politik kediri empu ti madahka iya (Nyabong) enda agi nyadi chalun maya Pengawa Bepilih Nengeri (PRN) ti deka datai kena 2021 ila.  Iya madahka pekara nya enda masuk akal sereta jaku sengapa. Tambah mega, iya ngelalau mensia mayuh ngambika nemu gaya politik ti kamah sereta anang ibuhka sida.

“Aku bisi nerima timbal ari konstituensyen aku, bisi sekeda raban ngembuan juluk politik kediri empu enggau tuju ati ti jai nyadung berita bula pasal aku (Nyabong) ti madah enda bediri di Pelagus ngetanka kerusi nya. Tu jaku ngapa lalu aku ngelalau mensia mayuh ngambika bansu enggau gaya politik kamah sereta bedulika sida nya. Aku seruran ditu enggau bejalaika servis ngagai kita,” Ku Nyabong.

“Taja aku Sekretari Politik Kepala Menteri Sarawak enggau nyadi pengari rayat  ke dipilih ba taun 2016, fokus aku meri servis ngagai rayat. Nyadi YB, tanggungpengawa aku iya nya bejalaika servis ke pemadu manah ni ke ulih aku. Tebal agi, jam aku mayuh dikena  bejalaika pengawa ngelingi konstituensyen  aku di Pelagus; nemuai ngagai sekula, rumah panjai, meri projek , betemu enggau rayat sereta merambu projek infrastruktur. Ba pekara tu, aku fokus ngagai pemansang infrastruktur pemun. Nangkanka nya, aku mega merambu ungkup  aktiviti sosio- ekonomi,” ku iya.

“Pemansang sosio-ekonomi nya beguna amat. Pengidup di rumah panjai patut dikemanah. Peranak kandang menua pesisir bisi bank tanah. Maya bisi jalai alun, sida ulih merambu pengawa betanam betupi komersial ba tanah sida dikena ngangkatka penatai pemisi. Enti tikas pengidup sida udah diangkat, sida ulih keluar ari pengidup ti seranta. Pia mega, sida ulih melanja aku ‘kopi o’,” ku iya.

Berebak enggau nya, Pemesai Pelilih Kapit, Cerisologo Sabut mega nerangka ngagai 31 pintu bilik Rumah Ngidang sentang mayuh macham bantu ari perintah ungkup peranak rumah panjai.

Iya madah perintah udah ngemendarka agih belanja dikena ngangkatmanah Rumah Ngidang. Iya ngelalau peranak kandang menua nya begempung dalam pengawa enggau Tuai Rumah Ngidang sereta JKKK ba pengawa sentang pekara ti dikemeratka sida dikena ngangkatmanah rumah panjai ungkup pemaik semua peranak.