Anda di sini

FPL keterubah di Sarawak udah dipenyadika ba Sepital Sibu

 Dr Ramli (kiba) lebuh ti nyuaka ubat ngagai Roslan ti nyadi orang keterubah ngena servis ‘Farmasi Pandu Lalu’ ba Sepital Sibu.
KETERUBAH: Dr Ramli (kiba) lebuh ti nyuaka ubat ngagai Roslan ti nyadi orang keterubah ngena servis ‘Farmasi Pandu Lalu’ ba Sepital Sibu.

SIBU: ‘Perkhidmatan Farmasi Pandu Lalu’ (FPL) keterubah endar di Sarawak udah mujur dipenyadika ba Sepital Sibu ensanus, lalu diperambuka deka diatur ba semua sepital pelilih menua Sarawak enti sema mantai sereta ngenataika asil ti manah ari mensia mayuh ditu.

Direktor Kanan Program Servis Farmasi Opis Besai Pengerai Malaysia (KKM) Dr. Ramli Zainal madah, FPL tu siti ari Servis ti dikumbai ‘Tambah Nilai Farmasi KKM’ ti nyendiaka mayuh bengkah ubat ngagai orang ti sakit.

“Sepital kitai ditu seruran dedat laban orang ti berubat, nya alai tu mih siti chara kitai mantu orang ti sakit ngambika ngelempungka pengawa sida lebuh ti beambika ubat.

“Palan tu diungkupka ngagai sida ti ngambi ubat ninting bulan, kelebih agi sida ti ngembuan penyakit kronik.

“Nengah atur pengawa tu, orang ti sakit deka jampat sereta muntang agi ngambi ubat, kitai mega ulih ngurangka penyekut mensia mayuh enggau palan engkah entukar ba sepital,” ku iya madah ngagai pengarang berita.

Bisi datai mega Sapit Direktor Opis Pengerai (FARMASI) Sarawak Abu Hassan Alshaari Abdul Jabar, Direktor Opis Menteri Pengerai Malaysia Seksyen Ngemeranka Kereja enggau Pemansang Farmasi Dr. Roshayati Mohamad Sani, Sapit Direktor Opis Menteri Pengerai Malaysia Seksyen Ngemeranka Kereja enggau Pemansang Farmasi Salbiah Mohd Salleh sereta Sapit Direktor Sepital Sibu Dr Mohd Ng Siah.

“Ke diatu, kami bisi 36 iku orang sakit kronik ti udah ngerejista diri ba FPL ditu, nya alai kami minta bala pengarang berita nesau mensia mayuh bekaul enggau penumbuh FPL ngambika mayuh agi orang nemu sereta nambah agi dudi ila,” ku iya.

Berebak enggau nya, Dr. Ramli mega madahka palan FPL mudah ditemu iya nya berimbai enggau Kantin Sepital Sibu, lalu maya FPL tu dipejalaika iya nya ari pukul 8.00 pagi nyentuk 5.00 lemai ninting Hari Satu ngagai Hari Lima aja (enda nyengkaum hari besai, Hari Enam enggau Hari Minggu).

Orang ti sakit tauka pengari sida patut ngerejista diri dulu ba Farmasi Luar Sepital Sibu sebedau begunaka FPL tu.

Bekaul enggau ngerejista diri tauka sebarang tanya ti silik agi, mensia mayuh tau betelefon ngagai Opis Farmasi Sepital Sibu nengah lumur 084-343333 tauka datai betanya ngagai raban Farmasi ba kaunter sida (Bilik 36, Sepital Sibu).