Anda di sini

Program DLP berengkah dipejalaika taun baru

 Dr Amin (tiga kanan) ngaga simbolik maya Bejadi Pengawa Bejalaika Program DLP Sarawak di Kuching ensanus.
KELAI PROGRAM DLP: Dr Amin (tiga kanan) ngaga simbolik maya Bejadi Pengawa Bejalaika Program DLP Sarawak di Kuching ensanus.

KUCHING: Program Dwibahasa (DLP) ungkup dua batang subjek iya nya Sains enggau Matematik dalam Jaku Inggeris berengkah taun baru, deka dipejalaika ba 1,408 buah sekula primari (SK) di nengeri tu.

Ketuai Direktor Opis Pelajar, Datuk Dr Amin Senin madahka pengawa bejalaika program DLP di nengeri tu deka ngena garis lalau ke udah ditetapka kediri nengah Surat Pekeliling Ikhisas (SPI) Bil. 7 2019 kena 15 November taun tu.

“Sepenyampau 1,048 buah sekula primari bisi nyereta ba pengawa bejalaika program DLP di nengeri tu berengkah taun baru ila.

“Nengah bejalaika program tu, semua nembiak Primari Satu di Sarawak deka belajar subjek Sains enggau Matematik ngena Jaku Inggeris penuh,” ku iya.

Iya madah munyi nya maya bejaku ba pengerami Ngemunka Pengawa Bejalaika Program DLP Sarawak di sebuah hotel ditu, ensanus. Sama bisi datai iya nya Direktor Opis Pelajar Sarawak, Dr Azhar Ahmad.

Program DLP nya, ku iya endang setipak enggau Pelin Pemansang Pelajar Malaysia (PPPM), 2013-2025 ‘Anjakan 2’ iya nya nentuka tetiap iku nembiak landik dalam Jaku Malaysia enggau Jaku Inggeris, seriris enggau juluk perintah Sarawak deka ngemansangka ekonomi nengeri dikena nyapai status bepenatai pemisi tinggi ba taun 2030.

Ku Amin, program DLP Sarawak nya bepelasarka kokurikulum ti udah ditetapka opis menteri.

“Nya alai, nadai bida entara kurikulum Sains enggau Matematik di nengeri Sarawak dibanding enggau nengeri bukai. Bida semina ari sukut ngena Jaku Inggeris enggau Jaku Melayu,” ku iya nerang.

Iya nambah, program DLP di nengeri tu endang tentu enda melakangka guna Jaku Melayu ti nyadi Jaku Menua.

“Baka kitai ti deka ngenegapka Jaku Inggeris ba bala nembiak, kitai mega seruran ngangkatka Jaku Melayu nyadi Jaku Menua kitai,” ku iya nyemetak.

Iya pechaya program DLP di nengeri tu ulih mai ubah ngagai tikas peninggi pengelandik nguasa penemu dalam bidang Sains enggau Matematik.

Pia mega, iya ngelanggur pengajar Jaku Inggeris begulai pengajar Matematik enggau Sains dikena ngangkatka tikas pengelandik nguasa jaku nya ngena perengka teknologi ke bisi.

“Enti kitai deka ngaga kus, nya endang tentu begunaka belanja ti besai. Nya kebuah aku ngelanggur Sarawak ngena chara tu. Enti ulih, dipelaba ninting minggu pengajar Jaku Inggeris, Matematik enggau Sains ulih bekomunikasyen enggau pangan diri ngena teknologi moden diatu baka nengah video (Facetime), komputer enggau WhatsApp dini-dini endur tauka barang maya aja.

“Aku pechaya chara tu ulih ngangkatka pengandal bala pengajar Matematik enggau Sains ti ngajar Jaku Inggeris ila lalu dikena bejalaika pengawa nya, kitai begunaka komitmen ari pengajar Jaku Inggeris ngaga ‘personal coaching’ nengah laman ti mayuh mantu sereta ngenyimatka ungkus,” ku iya.