Anda di sini

Perengkaguna ba Taman Negara deka diangkatmanah

Advertisement
 Len (tiga kiba) nyuaka tepa ngagai Abang Johari seraya dikemataka Direktor Opis Kampung SarawakDatu Hamden Mohammad (kiba) enggau CEO SFC Zolkipli Mohamad Aton (dua kiba).
TERIMA KASIH: Len (tiga kiba) nyuaka tepa ngagai Abang Johari seraya dikemataka Direktor Opis Kampung SarawakDatu Hamden Mohammad (kiba) enggau CEO SFC Zolkipli Mohamad Aton (dua kiba).

KUCHING: Perintah nengeri deka ngangkatmanah  perengkaguna ba Taman Negara ke bisi di nengeri tu ti nyadi chara matak mayuh temuai ke nengeri tu.

Kepala Menteri, Datuk Patinggi Abang Johari Tun Openg penatai bala temuai ke nengeri tu agi mayuh napatka Taman Negara enggau Orang Utan.

“Aku agi ingat maya aku di Hong Kong, orang Hong Kong nanya aku sentang Ritchie (Orang Utan) di Palan Ngintu Orang Utan Semenggoh.

“Tu mandangka sida di Hong Kong mega nemu sentang Orang Utan kitai lalu di Kuching aja kitai bisi tujuh Taman Negara.  

“Tang kitai mesti ngangkatmanah perengkaguna di Taman Negara kitai baka di Bako, Semenggoh nyengkaum di Gua Niah,” ku iya.

Iya bejaku munyi nya ba Pengerami Makai Lemai Ke-16 Taun Sarawak Forestry Corporation (SFC) udah ditumbuhka di sebuah hotel tebilang ditu malam ensanus.

Ari sukut promosyen, Abang Johari minta Kaunsil Pengatur SFC matak sektor peribit mantu ngelakuka Taman Negara bisi diatu.

“Sektor peribit manah amat asi sukut ngelaku enggau ngiga makit baru. Tang nya mesti temuai ke ulih dijaga ukai temuai ke bisi penanggul.

“Kitai tau neritka premium ngagai temuai ke ulih dijaga tu dikena kitai ngulihka belanja dikena ngangkatmanah infrastuktur dalam Taman Negara kitai.

“Aku pechaya kitai ulih matak temuai ke baka tu ti tau meri penatai pemisi premium ngagai nengeri,” ku iya.

Berebak enggau nya, Abang Johari nandu madahka perintah nengeri tegap enggau pemutus mekuka permit dikena numbuhka ladang sawit baru.

Palan nya ku iya, deka dibuka ungkup Taman Agro ngambi ngemansutka pemakai ke guna domestik enggau eksport.

Ba timpuh ke sama ku iya, kampung ti udah diperimba patut ditanam kayu baru dikena nyaga rampa menua sereta mutarka penanggul ubah gaya hari.

Ba pengerami nya, Abang Johari mega bisi ngemataka pengawa nyain Memorandum Pemereti Ati (MoU) antara SFC Sdn Bhd (SFCSB) enggau Universiti New South Wales.

MoU nya disain antara Ketuai Pemesai Eksekutif SFCSB, Zulkipli Mohammad Aton enggau Prof Darren Curnoe.

Sama bisi ngulu  pengerami nya, Menteri Muda Perambu Mengeri, Pengatur Tanah enggau Rampa Menua, Datu Len Talif Salleh ke mega Chairman SFC sereta bala bukai.  

Advertisement