Anda di sini

Florence Remi Lanchang teulihka penatai pemisi RM17,000 sebulan muka kedai runchit

Advertisement
 Florence nerima gelar ari Menteri KWKPK, Dato Sri Fatimah Abdullah maya Karnival Wellbest Sarawak nya. — Gambar Muhammad Rais Sanusi
TERIMA MIH: Florence nerima gelar ari Menteri KWKPK, Dato Sri Fatimah Abdullah maya Karnival Wellbest Sarawak nya. — Gambar Muhammad Rais Sanusi

KUCHING: Sapa nyangka semina muka kedai runchit nyual produk utai tanam, Florence Remi Lanchang teulihka penatai pemisi RM17,000 sebulan.

Juluk ati iya ti tinggi deka mujur sereta pengingin deka ngasaika pengelantang ba pengidup nyadika peransang ngagai Florence bebendar deka nyapai juluk dikedeka ke iya.

“Keterubah pengidup kami sebilik endang susah. Bejual ba tisi jalai, nadai kerita lalu asil penatai pemisi semina RM600 sebulan aja.

“Idup kami sebilik berubah lebuh aku nyereta program Pengelantang Pendiau Orang Dagang Mikro (UMK) taun nyin kemari lalu diatu penatai pemisi beresi aku udah manggai RM17,000 sebulan,” ku iya.

Florence madah munyi nya lebuh dikerandau pengudah nerima Gelar Platinum UMK Chunto 2918/2019 beserimbai Karnival Wellbest Sarawak di Metrocity ditu bedau lama udah.

Karnival sereta gelar nya entara program ninting taun Opis Pemansang Raban Bansa (JKM) Sarawak ari baruh Opis Menteri Pengintu Pengelantang Pendiau, Orang Indu, Ruang Bilik enggau pemansang Anak Mit (KWKPK).

Florence ke mega indai tunggal bisi tiga iku anak madah, ngena geran RM5,000 ari baruh program UMK, nya kena meli perengka dikena bejual.

Perengka nya baka peti ais alai naruh produk asil tanam ke dijual enggau perengka alai produk ba kedai runchit ti dibuka di Pasar Basah Emart Batu Kawa.

Kelimpah ari nya, iya mega bisi muka lot alai bejual ba palan bukai baka Kubah Ria nyengkaum bejual ba pasar malam.

Pengudah pemujur dipilih nyadi pemenang Gelar Platinum UMK Chunto, Indu Iban ke beasal ari Selangau lalu diatu memdam di Kuching deka ngerembaika agi dagang iya.

“Aku deka mandangka ngagai mensia mayuh ke alai indai tunggal mega ulih mujur baka orang bukai lalu ulih idup ngatika diri sereta enda mudah lemi laban penguji.

“Aku enggai agi terus idup dalam penusah baka ke udah ditapi aku sebedau tu begulai enggau bala anak aku,” ku iya.

Advertisement