Dikarang Rengenyan Labang
KUCHING: Bup 'Panduan Bergambar Perosak Buah-buahan di Sarawak' asil pengawa pemasik enggau pemansang (R&D) Opis Betanam Betupi nengeri tu udah dipenyadi sehari tu.
Bup nya mujur dipenyadi Menteri Muda Betanam Betupi Moden, Tanah Adat enggau Pemansang Kandang Menua Datuk Dr Abdul Rahman Ismail nyerumba iya nganti Sapit Kepala Menteri Datuk Amar Douglas Uggah Embas bejadika 'Research Officers Progress Meeting' (ROPM) 2019 ditu.
Bup nya dikearap ulih nyadika lalau sereta beguna kelebih agi ngagai orang ti betanam betupi, ku Uggah.
Laban ku iya, indu utai ti ngerusak enggau penyakit iya nya faktor ti ulih ngeruga asil utai tanam.
"Aku arap bendar bup tu deka nyadika lalau enggau malin beguna ngagai ejensi bukai sereta orang betanam betupi sekalika lebuh deka ngelala enggau nguruska penanggul diserang indu utai ti ngerusak ba macham buah ti ditanam.
"Aku ngambi peluang tu meri puji ngagai raban pemansik ti sama bejalaika inisiatif nyelak bup tu.
"Taja pia, aku deka meda mayuh agi R&D ngena teknologi ICT enggau digital ti deka dipejalaika pasal pekara tu," ku Uggah ti mega Menteri Betanam Betupi Moden, Tanah Adat enggau Pemansang Kandang Menua dalam teks jaku iya ti dibacha Dr Rahman.
Dulu ari nya dalam jaku pengelalu, Pemangku Direktor Opis Betanam Betupi Sarawak (JPS) Dr. Alvin Chai Kuet Lian madahka program tiga hari ROPM 2019 digulu 95 iku pegawai ti nyengkaum 90 ari JPS, tiga ari Opis Menteri betanam Betupi Moden, Tanah Adat enggau Pemansang Kandang Menua (MANRED) enggau dua pemesai ari Opis Betanam Betupi Sabah.
ROPM iya nya program ninting taun diatur ungkup pemesai pemansik ari Crop Research Division, Inland Fisheries Division enggau Soil Management Branch ari JPS Sarawak.
"Batang tuju aum tu diatur ungkup pemesai pemansik iya nya ngambika sida ngayan tauka mantaika asil pansik ke penerang enggau guna pemesai dalam opis (JPS).
"Kedua, ngambika pemesai pemansik tu ulih mantaika nama projek pemansik ke dipejalaika diatu," ku iya.