MIRI: Rayat patut nerima enggau manah pengawa perintah nengeri ti seruran beratka pengelantang pendiau rayat.
Menteri Utiliti Sarawak, Datuk Sri Stephen Rundi Utom madah, perintah terus bejalaika projek pemansang dikena pemansang rayat kelebih agi di menua pesisir.
Iya madah, seagi Gabungan Parti Sarawak megai perintah nengeri, pemansang enggau pengelantang pendiau rayat deka seruran nyadi pekara ti dikemerat.
“GPS nya parti politik kandang menua tu lalu nemu sentang ke guna rayat di nengeri tu, nya alai rayat patut ngembuan pengandal ngagai GPS,” ku iya bejaku ba pengerami makai malam Serakup Raban Bisaya Sarawak Pampang Miri (PBSM) ke mega ngemunka ‘Piala Presiden’ di sebuah hotel malam tadi.
Teks jaku iya dibacha Kaban Kunsil Nengeri (ADUN) Telang Usan Dennis Ngau.
Iya ngansak semua kaban serakup nya ngambika beinteraksyen sereta besilih penemu dalam ngemansangka pampang serakup sida.
Ku iya, tu ulih ngemansangka komuniti Bisaya nuju ngagai penyulut.
Iya ngarap semua kaban serakup seruran bekerejasama lalu mikirka chara pemadu manah ngiring pampang sida empu ngambika mujur agi dalam mayuh bengkah bidang.
“Aku dipadah PBS nya entara gerempung dalam Persekutuan Persatuan Orang Ulu Sarawak, Malaysia (FORUM) ke chakah bejalaika mayuh bengkah aktiviti kelebih agi Pesta Babulang enggau Lumba Kerbau kenyau ari 2004.”
“Aku ngarap kaban gerempung seruran nyukung pengawa bala ketuai PBS ngambika chakah mantu komuniti Bisaya nuju ngagai penyulut ti tampak rita,” ku iya.
Ba pengerami nya, Rundi bisi ngungkupka geran Projek Mit Menua Pesisir (MRP) ungkup PBSM RM10,000 lalu Dennis iya nya sepenyampau RM8,000.
Dulu agi ari tu, Presiden PBS Datu Antonio Kahti Galis ke mega chairman PBSM bejaku, sukung semua kaban serakup beguna amat dikena neruska pengawa ti dipejalaika serakup nya.
Nya alai, enti nadai sukung ari bala kaban nya, serakup nya pedis deka ngatur aktiviti ke udah diperambu serakup ba renggat indu opis enggau renggat pampang.
Antonio mega bisi madahka belanja ari ADUN Batu Danau Paulus Palu Gumbang sepenyampau RM5,000 enggau RM10,000 ari Kaban Parlimen Baram Anyi Ngau.