SRI AMAN: Kaban Kunsil Nengeri (ADUN) Lingga, Simoi Peri minta berundingka berapa iti projek ari perintah nengeri dikena ngangkatka agi sosio ekonomi peranak kandang menua Lingga.
Bejaku ba Pengerami Nasih Tanah Projek Pemansang Tebing Sungai enggau Palan Servis Lingga ba Pasar Sri Aman ditu kemari, Sikoi madah pekara keguna iya nya padang main bol ungkup nembiak di Lingga.
Ungkus belanja padang main bol ti disikap ngena dewan enggau Komplek Mit Lumba enggau Main tu iya nya urung RM18 juta nyengkaum ba mayar ngambi tanah.
“Nengah awak tu aku deka minta projek ngaga Rumah Endur Ngetu Di Lingga.
“Tu sebagi ari perengkaguna pemesai perintah enggau mensia ti datai ngagai Lingga.
“Tambah mega, rumah endur ngetu tu udah lama sereta enda manah endur temuai diau” ku iya.
“Simoi mega minta perintah nengeri ngambika Pasar Lama Lingga ke bisi nya diangkatmanah sereta meruan nyadi pesaka asal enggau begunan lama ti nyelai.
Pasar Lama Lingga tu ku iya ulih nyadi produk dagang temuai ti mandangka perengka pesaka asal ungkup temuai ke beungkus RM3 juta.
Dikena nangkup keguna kandang menua Ladong enggau Lemanak, Simoi mega minta digaga palan dikena nagang tanah tusur di Kampung Hilir, Kampung Hulu nyentuk ngagai Kampung Pasir Panas, Simanggang nyengkaum ba Stumbin, Tanjung Bijat, Kampung Lingga enggau Maludam.
Nitihka gaya kemaya hari, rumah tebing sungai Batang Lupar benung napi penusah ti balat deka runtuh lalu semina nganti deka anyut bai ai.
Dulu agi ari tu, Simoi ngarika rayat di Lingga mega meri terima kasih ngagai perintah Gabungan Parti Sarawak (GPS) ti udah melanja sereta ngemendarka berapa iti projek ba kandang menua nya.
Entara nya, Gerai Kampung Maludam ke udah tembu, begunan baru Sekula Sekondari (SMK) Maludam beungkus sepenyampau RM20 juta, Skim Palan Pengetap Baru Maludam, ngangkatmanah Padang Bol Maludam enggau Mini Grand Stand, sereta Dewan Baru Maludam.
Projek ke bukai nyengkaum Tebing Lingga, Pasar Baru Lingga, Jalai Lingga-Sebuyau, Jematan Lidong ba Tanjung Engkabang Sri Aman enggau Jematan Batang Lupar.
Simoi pechaya, semua projek tu deka meri empas ti besai ngagai rayat ba kandang menua Lingga.