BELURU: Raban nembiak ba kandang menua Marudi patut nemu polisi enggau program Gabungan Parti Sarawak (GPS) ngambika bela ngemansangka kandang menua sida.
Kaban Kunsil Nengeri (ADUN) Marudi Datu Dr Penguang Manggil madah, perintah nengeri udah ngemendarka agih belanja ke besai dikena nyendiaka perengkaguna pemun kelebih agi nangkup keguna raban nembiak.
Iya madah munyi nya, entara projek tu iya nya ngaga Komplek Lumba enggau Main Mit Beluru ti beungkus RM15 juta, masang tiang komunikasyen dikena ngangkatmanah akses telekomunikasi enggau internet, latih pengelandik enggau palan ngumpul produk betanam betupi di Marudi sereta Beluru.
“Pengawa ngaga perengkaguna tu mandangka perintah GPS mekuh ba pemansang nembiak nengah ekonomi bepelasarka ekonomi digital, betanam betupi moden, lumba enggau main sereta pelajar.”
“Aku pechaya enggau sukung penuh ari raban nembiak, kitai ulih ngemansangka kandang menua Marudi enggau jampat agi. Aku pechaya ekonomi deka terus ngerembai lalu mai pemaik ngagai raban nembiak ditu,” ku iya.
Penguang ke mega Menteri Muda kaunsil Kandang Menua madah munyi nya lebuh pengawa Town Hall Raban Nembiak bepalan ba Balai Komuniti di Beluru, ditu, ensanus.
Pengawa nya diatur Raban Nembiak Parti Demokratik Progresif (PDP) Marudi ti mungkur urung 300 iku nembiak ngarika tujuh pampang iya nya Nabor, Teruking, Marudi, Beluru, Pengalayan, Jegan Hulu enggau Jegan Hilir.
Iya madah, raban nembiak patut nemu tanggungpengawa ti dipejalaika GPS iya nya ngetanka hak Sarawak ngambika Sempekat Malaysia 1963 dititih.
“Perintah nengeri ari baruh GPS deka ngambi abru hak Sarawak ke majak lenyau baka royalti minyak.”
“Nya alai, aku ngansak raban nembiak ngambika amat meretika gaya politik diatu lalu enda mudah nitihka jaku orang luar ti nguji deka ngasut sida,” ku kata Penguang.
Ku iya, semua pemansang ke benung dipejalaika enggau ke udah digaga perintah Sarawak nya ungkup pemaik sida ti nyadi ketuai dudi hari ila.
Nengah pengawa Taown Hall nya, Penguang ngelaluka penemu enggau runding ti dibantai raban nembiak ke dia.
“Batang tuju iya nya ngulihka input enggau perambu ari bala nembiak Marudi dikena ngemansangka kandang menua tu. Nya alai, semua projek pemansang ti dipejalaika patut nitih peminta ke deka rayat ukai kedeka aku,” ku iya.
Entara pekara ti dibantai raban nembiak ke bisi ngulu iya nya mai mayuh agi program pasal kereja ngagai kandang menua pesisir baka di Beluru.
Ku runding sida, sekeda raban nembiak ditu pedis deka nitihka interbiu di Miri ketegal ari pekara ke bukai baka ari sukut perengka pengangkut.
Nya alai, sida deka program tu dikerembai agi di kandang menua pesisir dikena mantu raban nembiak ngisi peluang kereja.
Ketuai Raban Nembiak PDP Marudi Cassy Andy Ujang madah, tu entara pengawa town hall raban nembiak keterubah diatur ti meri peluang ngagai sida mantaika penemu bekaul enggau pemansang kemaya hari.
“Kitai dekaka urung 200 iku pesereta tang penyampau ke bisi datai iya nya manah amat. Kitai ngarap ulih ngatur mayuh agi aktivti ungkup raban nembiak dudi hari ila,” ku iya.
Sama bisi datai iya nya Martin Dinil ke mega kaban raban nembiak enggau moderator town hall, bala ketuai raban bansa sereta Chairman Kaunsil Pelilih Marudi Edward Mendai.