KABONG: Program Pengelandik nguasa 3M iya nya Macha, Nulis enggau Ngira siti ari program ti meri pemaik sereta beguna ngagai komuniti kelebih agi rebak tuai kemaya hari tu, ku Kaban Parlimen Saratok, Ali Biju.
Ku iya, rebak tuai tu agi mayuh ba tetiap sitak parlimen di nengeri Sarawak.
Iya madah munyi nya lebuh bejaku ba pengerami bejadi ‘Hari Literasi Program Pengukuhan Kelas Pendidikan Literasi Fungsian’ (PLF) Renggat Sarawak ke diatur Opis Pemansang Raban Bansa (KEMAS) Sarawak enggau Opis KEMAS Parlimen Saratok bepalan di Dewan Sekolah Jenis Kebangsaan (SJK) Chung Hua, Kabong ditu.
Seraya meri tanda basa ngagai KEMAS Sarawak enggau Parlimen Saratok, Ali nerangka pengawa sereta juluk tu patut diteruska belama ngambi komuniti di luar mengeri kelebih agi rebak tuai ulih ngasaika baru proses belajarka sentang 3M tu lalu ulih ngurangka tikas enda nemu 3M di nengeri tu.
Ku iya nerang, nengah proses tu tikas orang ti enda nemu 3M ulih dikurangka lalu dikearap sida bulih pemaik ari penemu enggau penerang ti diberi kelimpah ngangkatka diri, diri sebilik sida enggau ngerebut mayuh macham awak ke bisi sereta peluang ekonomi.
Ku iya nambah agi, sebedau tu apai indai semina bepanggai ba anak tauka orang ngelingi sida endur betanya tauka ba pengawa baka macha, ngira enggau nulis.
Tang nengah pemisi program bakatu ti diatur KEMAS, mayuh komuniti kitai udah pandai ba sentang nya lalu ngarapka program tu sekali agi semampai nerima sukung dalam juluk deka ngangkat tikas kualiti enggau pamansang komuniti kitai nuju ngagai orang ti bepenemu.
“Munyi ku sempama; ‘Tuntutlah ilmu itu walaupun sehingga ke negeri China’,” ku iya.
Sama bisi datai iya nya Sapit Ketuai Direktor Operasyen ti bejalaika pengawa Ketuai Direktor KEMAS Malaysia, Ahmad Kamal Idris Mohd Nawawi, pengari Direktor KEMAS Sarawak, Dayang Monalizawati Abang Ismail sereta Direktor Bagi Menua Indu Opis KEMAS Putrajaya.
‘Hari Literasi’ renggat nengeri Sarawak ti dipejalaika sepengelama dua hari tu mungkur pesereta ari Sarikei, Betong enggau Saratok. Mayuh macham aktiviti ke manah nyadi pemisi program ke diatur baka pekit tarit tali, pengawa pemandang ari mayuh macham ejensi, pengawa bejual, pekit ngubah sereta pekit nyumai, nyabut tikit benasit, pekit betanda enggau karaoke.
Dulu agi ari tu, Ali udah nyuaka mesin ngagai bala pesereta Program Peningkatan Pendapatan (PPP) sereta pengawa nyuaka setipikit ngagai peserta PLF ke udah nembuka proses belajar nya.