KUCHING: Penambah kes kena virus Human Immunodeficiency Virus (HIV) majak nyadi ba Sarawak sereta begunaka mayuh bengkah program enggau kimpin pemereti ati diatur.
Pemesai Pengerai Kuching, Dr Azlee Ayub madah enggau nambahka penemu sereta pemereti ati dalam komuniti endang berat laban nya ulih nentuka kes tu ditemu enggau tumu lalu chara berubat ti engkeman ulih berengkah digaga ngambika pesakit ti idup enggau HIV ulih bejalaika pengidup enggau normal sereta produktif.
“Di bagi menua Kuching, HIV mayuh nyadi ba raban orang lelaki dalam umur 20 ngagai 40 taun, lalu penyampau kes HIV diripot ngayanka trend ti majak niki.
“Ba taun 2013, penyampau kes HIV di Kuching iya nya 65 kes, tang ba taun 2018, sepenyampau 144 kes dirikod lalu 12 iku ari pesakit nya udah midang ketegal penyakit ti bekaul enggau AIDS.
“Nemu sereta berubat tumu ulih nagang HIV tu terus nyadi, ti ulih ngemanjaika umur pesakit lalu mantu nyeliahka transmisyen HIV ngagai orang ti enggau beleman, ti ulih nentuka orang ke idup enggau HIV bejalaika pengidup ti baka selama sereta produktif,” ku iya
Iya madah munyi nya lebuh bejaku bejadika Belanda Pengasih ‘Stand By Me’ kena pagi kemari ba Saradise, ditu.
Iya nambah program belanda nya diatur Persatuan Prihatin Sarawak (SACS) enggau kerejasama Opis Pengerai Nengeri (JKN) Sarawak dikearap ulih ngurangka runding bekaul penyakit nya lalu bakani komuniti nerima sida ti bisi HIV.
“Kitai patut nemu, HIV ukainya penyakit ti kamah, nya alai nadai kebuah deka ngelarika diri tauka enda begulai enggau orang ti idup tauka bisi HIV. Tang komuniti patut meri suung sereta meri pengandal ngagai sida berubat enggau chara ti patut.
“Sebedau tu, orang ti bisi penyakit HIV semina berubat ba sepital tang diatu sida ulih berubat ba fasiliti nyaga pengerai ke besai baka poliklinik enggau pakar berubat rung bilik. Tu ngemuntangka sida berubat,” ku iya nerang.
Ku iya penemu ti salah bekaul enggau HIV tu ulih ngasuh komuniti enda nemu tauka nerima mesej ti enda betul bekaul penyakit tu.
Nya alai, ku iya, kimpin pemereti ati senentang penyakit HIV tu beguna amat ukai semina ngasuh orang sakit ulih bejalaika pengidup ti baka selama tang muai penemu ti enda betul dalam komuniti.
“Virus HIV endang ulih idup ba luar tubuh mensia baka kulit, gari, ai tauka angin, HIV endang ulih berampit enti besium, bepegai jari, beberap, kunsi utai pakai tauka bekunsi ngena perengkaguna mensia mayuh baka pegung berenang sereta jamban.
“Nya mega enda ulih berampit enti engkasi, batuk, peluh, ai mata, ai kemi tauka digigit indu utai tauka jelu. Nya alai, kitai ulih makai begulai enggau sida, bekereja begulai sereta ngaga aktiviti rama enggau sida, reti nya sida idup enggau HIV tu ulih diau serumah enggau kitai,” ku iya.
Bisi datai Presiden SACS Dr Yuwana Podin.