KUCHING: Opis Betanam Betupi Nengeri (JPN) Sarawak diansak ngemaruka penerang utai tanam ti ulih ngeluarka asil ti besai dikena nyapai misyen Sarawak ti nyadi pengeluar pemakai besai datai ba taun 2030.
Sapit Kepala Menteri Datuk Amar Douglas Uggah madah, ngembuan penerang ti engkemean endang berat dikena meri ripot ti pemadu baru bekaul penyampau sereta palan kebendar utai tanam nya ti bisi potensial nyadi barang eksport ari nengeri tu.
“Ambika chunto, penerang bekaul pun rian ke bisi dipadahka ngagai kitai bisi 900,000 pun buah nya di nengeri tu. Tang tu agi nyadi tanda tanya dini palan pun buah nya, nya alai kitai patut begunaka penerang ke ngena ngambika ulih nemu palan nya.
“Pia mega enggau pun getah, kitai mayuh pun getah tang enda mayuh orang ti mutung getah. Tu nyadi penanggul ngagai kitai, nya alai penerang nya beguna ngambika kitai ulih ngatur pekara nya enggau manah.
“Kebuah pia laban nyema kitai nemu kandang menua ti pemnadu mayuh betanamka getah, kitai lalu ulih ngatur numbuhka Palan Ngumpul, Proses enggau Mungkus (CPCC) lalu nangkan ke nya kereja nyendiaka infrastruktur bukai dikena mutarka penanggul tu,” ku iya lebuh ti bejaku bejadi pengerami ‘Team Building’ JPN Sarawak 2019 di sebuah hotel tebilang ditu, kilah ensanus.
Sarawak ngengkahka pengandal ti tinggi ngagai opis menteri iya enggau ngemendarka agih belanja sepenyampau RM797 juta dalam bajet tuan nyin ila dikena ngangkatka sektor betanam betupi di nengeri tu.
Pia mega, ku Uggah, perintah Sarawak udah andalka opis menteri nya ulih nyapai juluk nyadi nengeri eksport tebesai pemakai datai ba taun 2030.
“Reti nya, urung 10 taun ti deka datai dikena nyapai juluk tu. Perintah udah meri agih belanja sereta juluk ngagai kitai, lalu rayat mega enggau pengandal ti tinggi laban sida nemu potensial sektor betanam betupi nengeri tu.
“Diatu tanggungpengawa kitai iya nya deka ke juluk tu nyadi nyata, lalu berengkah ari diatu aku dekaka kita (JPN Sarawak) ngasilka polisi raban pengatur penerang pemun utai tanam ti nemban. Kitai ngaga langgur tu ti udah ngaul semua unit, lalu enti patut kitai endang deka numbuhka CPCC.
“Kitai ngarapka kena Mac taun nyin ila, deka bisi ditemu palan 900,000 pun rian ti disebut aku nya tadi ngambika kitai ulih nemu enggau nyemetak penyampau aset kitai lalu mega ungkup perambu ti manah agi jemah ila,” ku iya nerang.
Iya mega minta pemesai unit JPN Sarawak ngambika nemu orang bumai ti nyulut laban nya endang polis opis menteri tu deka bisi ngembuan orang bumai ti pemadu nyulut.
Ku iya, orang bumai ti pemadu nyulut ti iya nya orang dagang agro ti udah mujur dalam aktiviti ‘downstream’, ngembuan kilang dikena proses utai tanam lalu ke paling beguna iya nya ngembuan produk ti bisi didagang.
Dulu agi ari nya, bisi 100 pesereta iya nya pemesai kanan JPN Sarawak nyereta program tu ti dipejalai sepengelama tiga hari berunggu berengkah ari 28 nyentuk 30 November.
Sama bisi datai iya nya Menteri Muda Betenam Betupi Moden, Tana Adat nggau Pemansang Kandang Menua Datuk Roland Sagah Wee Inn, Pemangku Direktor JPN Sarawak Dr Alvin Chai sereta temuai dipebasa ke bukai.