SIBU: Sepenyampau 20 iku penyereta bisi enggau ngulu Kus Pengelikun ba Endur Gawa Bekonsepka 360 enggau Perengkaguna, Isu Kastam sentang Import ti bepalan ba sebuah hotel di Sibu, kemari.
Kus nya keterubah diatur Maju Trading Consultant & Resources Sdn Bhd enggau kerejasama WK Corporate Consultancy & Secretarial Services.
Menteri Muda Pengawa Berumah Dr Annuar Rapa’ee madah, program seminar nya endang beguna dikena ngelalau sereta meri penemu bekaul enggau pekara ngemeratka pengelikun ba palan kereja.
“Semua kunteriktor, kompeni besai ke bekaul enggau sektor pengereja pengawa tauka pengatur, patut nyereta kus baka tu.
“Kus tu enda nagang pemujur nuan tang tu ngambika kita belemati sereta nitihka semua lalau ti bekaul enggau pengelikun,” ku iya bejaku ba program nutup pengawa kus nya, lemai kemari.
Menteri Muda Pengerai Mensia Mayuh nya mega madah, pengawa dagang sida kunteriktor deka nyadi penanggul enti bisi penusah nyadi ba palan kereja sida laban lalau tauka atur penglikun enda dikenati.
Nya alai, nadai salah enti mansut tauka bebayar enggau ungkus ti besai dikena ngangkatka tikas pengelikun ba palan kereja laban nya mulaika ke pemanah ngagai kompeni besai enggau orang ti gawa, ku iya.
“Kita enda tau ngambi jalai muntang sereta bekompromi ba pengelikun laban iya bekait enggau nyawa kita empu tauka orang bukai,” ku jaku tangkan iya.
Berebak enggau nya, bisi mega penatai ari Menijar Latihan Maju Trading Consultant & Resources Sdn Bhd Dr. Julian Jolly enggau Wilson Sigau Merang ari WK Corporate Consultancy & Secretarial Services.
Bala penyereta ke bisi datai maya nya raban kunteriktor enggau pengari industri ngaga kapal ari pelilih sitak menua tengah, Kuching enggau Miri.