MIRI: Apai indai diperansang chakah ngaul diri ba pelajar anak sida.
Bejaku ba pengerami ‘Anugerah Pelajar Cemerlang dan Penyampaian Sijil Tamat Sekolah Tahun Enam’ Sekula Primari (SK) Sri Mawar ditu bedau lama ti udah, Menteri Muda Orang Indu, Ruang Bilik enggau Pemansang Anak Mit Rosey Yunus nyemetak madah penyereta apai indai dalam program ke diatur sekula ulih meri pemaik ukai semina ngagai nembiak aja tang mega ngagai apai indai sereta sekula.
“Penyereta enggau penatai bala apai indai nengah program ke diatur sekula baka aktiviti kokurikulum meri reti ti besai ngagai anak sida laban nya meri empas ngagai pemansang akademik sida sereta ulah ba pelajar lalu ulih mandangka potensial sida kebendar,” ku iya.
Rosey mega nambah, iya gaga amat meda apai indai bisi datai nyukung kelebih agi ngagai bala anak sida laban nengah penatai nya mayuh meri peransang ngagai nembiak.
“Penatai kita nya nandaka pemujur bala pengajar ke udah ngajar anak kita semua semanjai sida ti besekula lalu nengah nya aku meri pengaga ati ngagai sekula sereta semua pengajar ba ditu.
“Tu ukai pekara mudah dikena ngatur pengawa enggau bebendar sereta ngajar anak mit laban pengajar begunaka pengelandik khas enggau pengeliat ati mereti lalu nangkup peminta guna sida nengah chara nerima output ari pengajar,” ku iya.
Rosey mega madah, tiap iku nembiak mit bisi potensial kediri empu lalu tiap iku ari sida nya pandai.
“Utai ke nyadi tanda tanya, bakani kitai ulih mantaika enggau meransang potensial sida ti deka meri bida ba tiap iku sida.
“Nyadi, patut dikeingat dikena mantaika potensial sida iya nya chakah ngaul diri dalam program ke diatur sekula.
“Aku pechaya nengah program enggau aktiviti tu, anak kitai ulih nempa pemanah ulah sida lalu lebih andal ngagai diri empu laban sida nya ti nyadi ketuai dudi hari ila, nya kebuah kitai patut ngelatih sida napi pemar dunya kebendar,” ku iya madah ngagai apai indai seraya nambah SK Sri Mawar ngembuan semua utai ke ulih mantu anak sida bulih pemujur.
“SK Sri Mawar udah nempa nembiak ti nyulut ba bidang korikulum sereta aktiviti kokurikulum tambah ti mantu ngemansangka tiap iku nembiak mit enggau chara ti holistik,” ku Rosey.
“Anak nya pesaka menua. Tu reta kitai lalu sekula mih palan dikena nempa pemanah ulah sida,” ku iya.
Sentang pengerami nya, Rosey meri pengaga ati ngagai sekula enggau komiti pengatur program laban udah mujur ngempuruka bala apai indai ngambika begulai enggau anak sida lalu nya sebagi ari pengawa ti besejarah dalam pengidup sida.
Bisi 40 iku nembiak ti deka nembuka pelajar ba SK Sri Mawar ke alai sida ti udah belajar ba sekula nya sepengelama enam taun lalu sida deka ngepunka sekula ba palan baru.
Entara ke bisi datai ba pengerami iya nya Kepala Pengajar Roslawati Ahmad, Chairman Komiti Pengatur Program Sekula Kuintan Sepawi, Sapit Chairman Pengatur Program Sekula Zainol Rashid Mustafa, Eksekutif Kanan Pengereja Pengawa Ngui Hui Lin, Kepala Pengajar Tadika Sri Mawar Evelyn Woodford, Pengatur pengerami Chia Tze Ping dibantu Pheobe Lo, Penulung Kanan Pekara Nembiak Yee Ming Yuan, Penulung Kanan KoKurikulum Wong Kheng Loong.