KUCHING: Orang ti madah tanah ke disukat ari baruh Seksyen 6 Kanun Tanah Nengeri nya tanah perintah, orang nya 'batu api'.
Sapit Kepala Menteri, Datuk Amar Douglas Uggah Embas madahka, Perintah Sarawak jamin ari baruh inisiatif baru tanah Adat Bansa Asal (NCR), pengawa nyukat tanah nengah Seksyen 6 iya nya tanah adat bansa asal (NCR).
"Aku meda dalam media sosial, ensanus pan agi bisi madah ke tanah ti digazet ari baruh Seksyen 6 iya nya tanah nengeri. Jangka aku endang chukup babal orang nya tauka batu api deka mambarka rayat.
"Kebendar iya papas laban perintah ari baruh iring YAB Kepala Menteri Datuk Patinggi Abang Johari Tun Openg bebendar deka mutarka penanggul rayat, tang iya disepiak nyin bebendar ngachuk runding rayat kena mambarka rayat, " ku iya.
Uggah ti mega Menteri Betanam Betupi, Tanah Adat enggau Pemansang Kandang Menua madahka pekara nya lebuh iya bejaku ba pengerami serumpu makai lemai ti digulu urung lebih 1,000 iku pesereta Forum Kanun Tanah (Ubah), 2018 Zon Selatan ( Bagi menua Kuching, Samarahan, Serian, Sri Aman & Betong) ti diatur Perintah Sarawak ba sebuah hotel ditu, malam tadi.
Dulu ari nya Uggah madahka di bagi menua Betong, Sri Aman, Serian, Samarahan, Kuching enggau mayuh agi kandang menua udah digaga kar sereta digazet nyadi tanah adat bansa asal (NCR) ari baruh Seksyen 6.
Reti nya ku Uggah, semua setuju (pengawa nyukat tanah ari baruh Seksyen 6) nyengkaum orang di kandang menua Krian.
"Nya alai malam tu (kemari) aku meri jamin ngagai semua tanah ke disukat sereta digazet ari baruh Seksyen 6 iya nya tanah nya tanah NCR ti diempu kita (pengempu)," ku iya.
Uggah ngenang, maya aum Kunsil Nengeri (DUN) apin lama bisi siku YB Kaban Kunsil Nengeri (ADUN) ti nyabung belaya madahka tanah Seksyen 6 iya nya tanah nengeri.
Lumur dua ku Uggah, iya (ADUN) madahka tanah Seksyen 6 enti diambi ulih perintah endur ngaga sekula, jalai alun enggau pemansang ke bukai, enda dipampas.
"(Kebendar) Lebuh Seksyen 6 udah disukat enggau digazet sereta siti setipikit ti udah digazet diberi ngagai raban bansa tauka pengempu tanah nya. Nya alai, maya ADUN ari Gabungan Parti Sarawak (GPS) nanya YB nya minta bukti, ni bukti tanah ti udah disukat ari baruh Seksyen 6 ke udah diambi pulai ulih perintah.
"Lalu iya (YB ADUN) enda ulih meri bukti, laban nya enda betul. Iya semina nemu nyabung orang belaya. Aku ngarapka kitai tanah ke udah disukat Seksyen 6 anang irau laban enti perintah begaga ke jalai, ngaga sekula, ngaga klinik tauka ke guna mensia mayuh, (tanah) nya deka dipampas," ku iya.
Uggah ke nyadi penyanding penemu forum nya ngarapka pesereta forum ulih bekunsi enggau raban bansa ba endur diri iya nya perintah ari iring Kepala Menteri Datuk Patinggi Abang Johari meri jamin iya nya semua tanah ti udah disurvei ari baruh Seksyen 6 iya nya diaku nyadi tanah NCR, lalu udah nya disukat ari baruh Seksyen 18.
Kepala Menteri ku iya, ba bajet 2020 ngungkup sereta ngemendarka RM40 juta dikena bejalaika pengawa nyukat tanah NCR lalu iya udah ngasuh mayuh endur disurvei ari baruh Seksyen 6, sereta ba taun baru numpu ngagai pengawa nyukat Seksyen 18, sereta meri pala tanah.
Pala tanah diberi enggau nadai minta bayar, lalu nya siti semaya Kepala Menteri ngagai rayat, ku Uggah.
"Ngagai rayat iya nya tanah ke bedau disukat ari baruh Seksyen 6, kitai ngarapka deka dipajakka laban tuju iya dikena nentuka bagi tanah nengeri enggau tanah NCR," ku iya.
Sama bisi datai ba pengerami nya Sekretari Perintah Nengeri ti mega nyadi chairman pengatur forum nya Datuk Amar Jaul Samion, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Menteri Muda Ba Opis Kepala Menteri (Tanah Adat enggau Undang-undang) Datuk John Sikie Tayai, Sapit Sekretari Perintah Nengeri (Transformasyen Menua Pesisir ti mega sapit chairman forum Datu Ik Pahon Joyik sereta ke bukai.