KUCHING: Kepala Menteri Datuk Patinggi Abang Johari Tun Openg sekali agi nandu nyema Petronas (Petroliam Nasional Berhad) enda mayar lima peratus Chukai Nyual Nengeri (State Sales Tax - SST) produk petroleum ngagai Sarawak, perintah nengeri deka ngena undang-undang.
Nitihku iya pekara nya nadai dikerandauka dalam aum Komiti Khas Kabinet (PEMANDU) bekaul enggau meda baru Sempekat Malaysia 1963 ti bechairmanka Menteri Besai Tun Dr Mahathir Mohamad, ti diatur di Putrajaya kena 18 November tu tadi.
“Pekara nya (lima peratus SST) nadai dikerandauka.
“Enda ngawa enti sida (Petronas) enda mayar, kitai nawa sida,” ku iya nyaut raban pengarang berita enggau pandak pasal pekara nya.
Dulu ari nya Abang Johari bejadi Opis Sarawak Multimedia Authority (SMA) ba Glassroom SMA Creative Heritage Inovation Centre, Begunan Yayasan Sarawak, Jalan Masjid ditu, kemari.
Abang Johari dulu ari nya ditanya bekaul enggau pekara ti diaum bala Komiti Khas Kabinet (PEMANDU) bekaul enggau pengawa meda baru Sempekat Malaysia 1963 (MA63) di Putrajaya, iya madah, pekara nya nya deka dibantaika Menteri Muda ba Opis Kepala Menteri (Undang-Undang, Kaul Perintah Nengeri-Besai enggau Pematau Projek) Datuk Sharifah Hasidah Sayeed Aman Ghazali.
Bekaul enggau pekara nya, Hasidah nengah penerang berita kemari madah nyentuk ke diatu bisi 21 isu udah dibantaika ngagai Komiti Khas Kabinet ngambika dipansik begulai.
Nyentuk 23 Julai 2019 ku Hasidah bisi tujuh isu udah sama disetuju baka ti dipadahka YAB Menteri Besai kena 19 Ogos 2019 tu tadi.
Entara pekara ti udah disetuju ku Hasidah iya nya pasal kuasa nyaga enggau ngemata pengawa nyadung gis enggau elekterik, numbuhka Komiti Kereja Negapka Kolaborasyen Bejalaika Projek Perintah Besai ti berandauka mekanisma pejalai projek perintah besai ba nengeri.
Nambahka nya, nyerahka kuasa ngagai Perintah Nengeri Sarawak enggau Sabah dikena ngaga undang - undang subsidari pasal ‘labour conditions peculiar to the state’ ari baruh ‘Ordinan Buruh’ nengeri kediri empu enggau numbuhka Komiti Khas Enggau Ngadu nengah chara berenggat dikena berandauka pekara bekaul enggau isu ngaduka pengerai Nengeri Sarawak enggau Sabah, ku iya.
“Aum ke diatur ke sekali tu iya nya aum kepenudi Komiti Khas kabinet (PEMANDU).
“Bisi pekara ti agi dikerandauka, iya nya Nyerenih Baru Pemeri Khas, royalti minyak enggau mayar mata duit petroleum, tanah nengeri ti diberi hak ngempu ngagai perintah besai, ‘kuasa baki perundangan’, nambahka pangku pengawa enggau sekeda pekara bukai.
“Bekaul enggau Nyerenih Baru Pemeri Khas, Opis Menteri Wang udah setuju ngatur baum baru ngambika ulih berandauka silik pasal langkar proses enggau prosedur sereta pasal formula ti deka dikena,” ku Hasidah nengah penerang berita.
Nitihku Hasidah, Nyerenih Baru Pemeri Khas, nya mega deka berandauka enggau nenak agi pekara bukai nyengkaum penyilih pemansut penatai pemisi ti disuaka ngagai perintah nengeri, iya nya duti import enggau eksais bekaul produk petroleum ke alai pemansut nya udah diketuka laban perintah besai nyain AFTA ba taun 2001.
“Pasal isu petroleum enggau gis, Komiti Khas tu udah setuju ke alai randau B2B (Business to Business) entara PETRONAS, PETROS enggau perintah nengeri deka ditampung.
“Lalu isu pasal bayar royalti enggau bayar mata duit ungkup petroleum enggau gis deka dikerandauka kediri entara YAB Menteri Besai enggau Kepala Menteri Sabah enggau Sarawak.
“Aum nya dipelabaka deka diatur ba bulan Disember,” ku iya ti madahka penerang berita aum Komiti Khas Kabinet (PEMANDU) kena 18 November tu tadi digulu 23 iku kaban komiti ti nyengkaum Menteri Kabinet Perintah Besai, Kepala Menteri Sarawak, Kepala Menteri Sabah enggau pemesai tinggi perintah besai, Sarawak enggau Sabah.
Kelimpah ari nya ku Hasidah, Komiti Khas Kabinet mega setuju ngambika siti KaunsilKhas ditumbuhka dikena matau pejalai pemutus ti udah digaga dalam Komiti Khas nya.
Kaunsil Khas ti deka ditumbuhka nya deka bechairmanka YAB Menteri Besai lalu kededua Kepala Menteri Sarawak enggau Sabah mega dichiri nyadi kaban Kaunsil Khas nya, ku iya.