KUCHING: Perintah Sarawak seruran ngemeratka sukut pengelantang rama kelimpah pemansang ekonomi enggau infrastruktur fizikal dalam nyapai pemansang ti sebela di nengeri tu.
Menteri Muda Pengintu Pengelantang Komuniti, Orang Indu, Ruang Bilik enggau Pemansang Anak Mit, Datuk Francis Hardin Hollis madah, pengelantang rama nya entara pekara ke beguna dalam pemansang Sarawak dikena nyapai status nengeri maju ba taun 2030 ila.
Ku iya, semua belanja, ungkus enggau pengawa dikena merambu, matau, atur pengawa enggau pekara mansik dalam pemansang rama nya dituku nyadi Beranakka Puku Rama baka beranakka puku dalam projek fizikal iya nya pengawa ngaga jalai alun, begunan enggau jematan.
“Nya alai, kitai ngansak tiap-tiap komuniti patut nemu agi sereta seruran bejalaika tanggungpengawa nyadi ‘mata’ enggau ‘pending’ ngagai perintah dalam juluk mutarka penanggul rama di nengeri tu.
“Pekara tu ulih dipejalaika nengah ngeripot semua penerang, penanggul enggau pengawa ti enda menuku ti nyadi ngelinggi sida ngagai opis tauka ejensi perintah ke bekaul,” ku iya lebuh bejaku ba pengawa nutup Program Randau Pemansang Rama Renggat 12/2019 di Kampung Long Sukang, Lawas kena Hari Minggu.
Pia mega, ku Francis, semua input, penemu, runding enggau timbal ti manah ari mensia mayuh beguna amat dikena ngangkatka pengawa enggau tikas servis ejensi perintah ngambika lebih responsif ngagai peminta sereta keguna komuniti di Sarawak.
“Kitai patut muai ulah ti bingking lebuh napi penanggul rama ngelinggi kitai ti madah enggai kiruh enggau pengawa orang bukai.
“Tang, pengandal ti beratka orang patut dikemeran ba komuniti kitai seriris enggau pengawa #careforSarawak ti disukung Opis Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit (KWKPK),” ku iya.
Francis mega ngansak Ketuai Raban Bansa enggau Ketuai Bansa (KMKK) sereta bala ketuai institusyen pengarap renggat genturung pendiau tauka rumah panjai ngambika terus ransing bejalaika pangku pengawa sida lalu lebih responsif dalam mantu mensia mayuh ti napi penusah ke bekaul enggau isu rama tu.
Ba pengerami nya, bisi 500 iku peranak kandang menua Kampung Long Sukang ngulu program randau ke diatur KWKPK sepengelama dua hari berengkah 16 Nov.
Sama bisi datai iya nya Sekretari Eksekutif Kaunsil Pemansang Rama, KWKPK, Dr Zufar Yadi Brendan Abdullah; Residen Bagi Menua Limbang, Ir Ahmad Denney Ahmad Fauzi enggau temuai ti dipebasa ke bukai.