KAPIT: Kaban Kunsil Nengeri Pelagus, Wilson Nyabong Ijang madahka gerija jalai pengarap Kristian (Katolik enggau Methodist) endang udah lama bisi di Sarawak. Gerija tu udah mayuh mantu ba pemansang sosio-ekonomi enggau pelajar rama di nengeri tu. Iya madah mayuh ketuai di nengeri enggau tokoh ke tebilang nya ex-nembiak sekula ti bepelasarka jalai pengarap.
“Gerija (gerija Kristian) udah lama bisi di Sarawak lalu pemisi nya diasai nengah bantu ti besai dalam pelajar sosio-ekonomi enggau pelajar rama Sarawak. Tebal agi bala ketuai di nengeri (politik) enggau bala tokoh nya ex-nembiak sekula ti bepelasarka pengarap. Berindik ari besekula ba sekula nya, sida nemu, lantang nerima penemu orang bukai, liberal sereta bebatak asur enggau pengarap bukai,” ku Nyabong ba Dewan Suarah Kapit maya iya bejadika pengerami ‘Parish Feast 2019’ Ke-137 ‘Mary Immaculate Conception Church Kapit’, bedau lama udah.
Ambika chunto, Nyabong madah bisi lapan buah sekula ti bepelasarka jalai pengarap di Kapit. Entara sekula tu iya nya SK Sungai Amang enggau SK Methodist di pasar Kapit, SM Methodist, SM Saints Elizabeth, SM Sacred Heart di Sibu, SM Saints Joseph di Miri, SM Saints Thomas, SM Saints Joseph, enggau ke bukai di Kuching. Sekula bepelasarka jalai pengarap di selampur nengeri nyendiaka pelajar ti bekualiti.
“Sida (Kepala Menteri meri basa ba atas tanggungpengawa sekula misyen dalam bidang pelajar). Kepala Menteri, Datuk Patinggi Abang Johari Tun Openg udah numbuhka Unit Jalai Pengarap Bukai (UNIFOR) lalu meri agih belanja ungkup institusyen pengarap bukai di nengeri tu. Sapit Kepala Menteri Datuk Amar Douglas Embas ti megai tanggungpengawa UNIFOR. Pun taun tu tadi, RM5 juta udah diungkup dikena ngaga Gerija Methodist Iban ke baru Kapit Bazar sepemanjai Jalai Memora, lalu RM50,000 ungkup Gerija Katolik di Song. Sebedau Kaunsil Parish ‘Mary Immaculate Conception Church Kapit’ ngenataika peminta bantu ngagai aku dikena ngangkatmanah gerija nya. Aku deka ngenataika ngagai UNIFOR dikena minta agih belanja nya,” ku Nyabong lalu disambut richah ari bala temuai ke datai.
Sentang ba pengerami nya, Nyabong betempap jari lebuh iya madah makai lemai nya disukung pengarap bukai sepemanjai sungai Rajang–Belaga, Kapit, Kanowit, Julau, Bintangor, Mukah enggau Sibu.
Iya ngelaluka Paderi datai ngulu pengerami nya-Reaktor ‘Mary Immaculate Conception Church’ Father Philip Pbaso enggau Father Michael Mandagiri, Father Mathews Olili ari Kanowit, Father Oniz Kihokolho, Father Sudhakar Meka, Father Selvan Kulanthai enggau FatherMichael Amir sereta ke bukai.
Ba pengerami nya, Nyabong bisi ngungkupka agih belanja RM20,000. ari Projek Mit Pemansang Menua Pesisir (MRP) ngagai gerija taun baru lalu ke bukai sepenyampau RM3,000. ungkup pengawa makai lemai. Penyampau semua agih belanja iya nya RM23,000 ari iya.
Batang tuju pengawa melah kek ulang taun ke-137 enggau pengawa nyuaka duit Insentif Nembiak Sekula Ti Nyulut ba peresa perintah baka UPSR, PT3, SPM, STPM enggau bala graduet ke bisi Degree.
Bisi tujuh buah gerija ke bisi ngulu pengerami tu.