Anda di sini

Festival Budayaw BIMP-EAGA pelasar negapka kaul entara menua

Advertisement
 Abdul Karim enggau bala temuai dipebasa ke bukai nebah dram ti nyadi kelai bejadi Festival Budayaw BIMP-EAGA 2019 di Kuching kemari.
KELAI BEJADI: Abdul Karim enggau bala temuai dipebasa ke bukai nebah dram ti nyadi kelai bejadi Festival Budayaw BIMP-EAGA 2019 di Kuching kemari.

KUCHING: Festival Budayaw BIMP-EAGA (Kandang Pemansang ASEAN Timur-Brunei Darussalam, Indonesia, Malaysia, Filipina) dipeda nyadi pelasar ke pemadu dikena negapka kaul entara menua nya.

Menteri Dagang Temuai, Seni enggau Main Asal Datuk Abdul Karim Rahman Hamzah madah, nya mega ulih ngelakuka dagang temuai sereta meri penatai pemisi ngagai menua BIMP-EAGA.

Ku iya, semua menua nya patut negapka pemereti ati sereta bebasaka pangan diri nengah festival ke diatur nya.

“Laban kaul ke manah entara menua Brunei Darussalam, Indonesia, Malaysia enggau Filipina tau meri penguntung ari mayuh sukut kelebih agi ari sukut ekonomi.

“Inisiatif nya mega ulih mantu nambahka pemereti ati sereta sama bebasaka pangan diri sereta ngelakuka industri dagang temuai serantau nengah sukung ari perintah enggau sektor peribit,” ku iya

Iya madah munyi lebuh ke bejaku bejadika Festival Budayaw BIMP-EAGA 2019 Edisiyen Kedua ti berambaika leka jaku ‘Keindahan dalam Kepelbagaian Budaya’ di Atrium Plaza Merdeka ditu, kemari.

Berebak enggau nya, Abdul Karim ke mega Menteri Nembiak Lumba enggau Main minta sektor peribit di nengeri sama enggau ba program BIMP-EAGA dudi ila.

“Pemisi sektor peribit dalam Festival Budayaw tu tau nyadi siti ari program tanggungpengawa rama korporat (CSR) sida,” ku iya.

Ku iya, Perintah Nengeri nengah Opis Menteri Dagang Temuai, Seni enggau Main Asal meri sukung ke penuh ba pengawa ngatur pengeri baka Festival Budayaw tu.

“Kami nyukung pengawa ngatur festival tu laban dipeda tau nyadi platform ngagai pengemeran budaya enggau artis ari mayuh bengkah menua begulai enggau bakih kunsi ari menua ke bukai besaum penemu,” ku iya.

Ngenang nya baru, Abdul Karim madahka Festival Budayaw nya mega bisi disereta raban pengari ari Kandang Menua Utara Australia kelimpah Brunei Darussalam, Indonesia, Malaysia enggau Filipina ke bisi 360 iku.

“Festival ti diatur pengelama lima hari nyentuk 23 November tu deka mantaika atur pengawa mantaika pengelandik, pemandang, enggau woksyop ari menua ke nyereta nya,” ku iya.

Sama bisi maya nya Sekretari Mendam Opis Menteri Seni enggau Main Asal, Hii Chang Kee sereta bala pengari ari menua BIMP-EAGA.

Advertisement