BINTULU: Bala pengajar di nengeri tu dipinta ngemeratka sukut 4M iya nya pengelandik macha, nulis, ngira enggau ulah ti manah ngagai semua bala nembiak ti diajar sida.
Direktor Opis Pelajar Sarawak Dr Azhar Ahmad madah, pengawa nguasa 4M ba bala nembiak seriris enggau juluk KPM era baru dalam nentuka juluk nembiak bepelasarka 4M ulih dijapai.
“Juluk kebendar kitai iya nya nempa nembiak ti dinamik, fleksibel, bepenau napi sebarang penanggul lalu mujur napi pemar gaya pengidup era Revolusyen Industri Keempat,” ku iya.
Iya madah munyi nya maya bejadi Kolokium Ngatur enggau Tanggungpengawa Ketuai Dalam Pelajar Renggat Menua 2019 di Dewan Kuliah Universiti Putra Malaysia Kampus Bintulu (UPMKB) kemari.
Ku iya, misyen enggau Visyen KPM iya nya seriris enggau rambai jaku kolokium taun tu iya nya ‘Memperkasakan Pendidikan, Melestarikan Kemenjadian Murid’.
Iya madah, dalam konteks Pelin Pemansang Pelajar Malaysia (PPPM) 2013-2015 ngena enam aspirasyen nembiak nyengkaum ari sukut penemu, pengelandik berunding, megai pangku pengawa, dwibahasa, gaya ulah enggau pengarap sereta identiti nasional.
Ku iya nerang, nengah PPPM semua nembiak bisi potensi ngemansangka diri nengah sukung penuh renggat bala ketuai sekula, pengajar, apai indai enggau komuniti.
“Tetiap entiti tu ngembuan pangku pengawa kediri empu dalam nentuka rebak biak nyapai aspirasyen ti dikearap ke sida,” ku iya nerang.
Sama bisi datai iya nya Pemesai Opis Pelajar Pelilih Menua Tatau Samri Suhaili, Pemesai Opis Pelajar Pelilih Sri Aman Abang Adam Abang Deli, Pengelicha Akademik Institut Pematih Pengajar (IPG) Batu Lintang Kuching Dr Abang Ismail Abang Julhi enggau Prinsipal Sekula Sekondari Ti Nyulut (SM) Sains Teluk Intan Perak Naharudeen Othman.