MUKAH: Pengari rayat enda patut ditagang ngulu barang bagi pengerami ti diatur di sekula.
Menteri Pengelantang Pendiau Komuniti enggau Orang Indu, Ruang Bilik enggau Pemansang Anak Mit, Dato Sri Fatimah Abdullah madah, pengari rayat tetap deka mantu meri pinta sekula nitihka pengulih sida.
“Nadai pematut nagang pengari rayat ngulu pengerami ti diatur di sekula,” ku iya lebuh ngulu Pengerami ‘Anugerah Pelajar Cemerlang Edisi Ke-40’ Sekolah Kebangsaan (SK) Datu Pengiran Mohamad, Oya di Dewan Mensia Mayuh Oya lemai kemari.
Ku iya, kenyau ari suba pengeran kerejasama enggau gawa beripa entara pengari rayat enggau mensia mayuh nadai kala putus sereta luya.
Sama mantu orang ti begunaka bantu nyengkaum sekula sebagi ari pengawa pengari rayat lalu nya udah nyadi dalam tubuh sida.
Bisi sekula di nengeri tu ti didirika ba atas tanah perintah besai ketegal deka meda bala nembiak bisi pelajar ke chukup sereta meruan ungkup jemah ila.
Ku iya baru, perengkaguna di sekula kelebih agi di menua pesisir mengkang kurang sereta amat begunaka bantu.
Fatimah mega madah, anang ketegal enda sebaka kuing parti politik entara perintah besai enggau nengeri tau nyadi penanggul ke baka nya.
Ngenang pengerami nya, nya besai amat reti ba bala nembiak, apai indai enggau pengajar ti naydi kelai ngaku sereta meri ba ngagai diri empu.
Sama bisi ngulu pengerami nya, Pemesai Opis Pelajar Pelilih Dalat Ahli Chikba enggau Kepala Pengajar SK Datu Pengiran Muhamad, Oya Kamal Jahuri.